नवी दिल्ली : वृत्तसंस्था
मुख्य निवडणूक आयुक्त ज्ञानेश कुमार यांच्याविरोधात शनिवारी दिल्लीत झालेल्या निदर्शनादरम्यान एका महिला पत्रकारासोबत गैरवर्तन झाल्याचा गंभीर प्रकार समोर आला आहे. कव्हरेज करत असताना एसीपी विवेक भगत यांनी आपल्याशी लैंगिक छळ आणि धक्काबुक्की केल्याचा आरोप या महिला पत्रकाराने केला आहे. या प्रकरणावरून आता दिल्लीत प्रचंड राजकारण आणि संताप पाहायला मिळत असून, सिव्हिल राइट्स अँड जस्टिसचे कार्यकर्ते संसद मार्ग पोलिस ठाण्याबाहेर जोरदार निदर्शने करत आहेत. तर सिजेपीचे सौरव दास व त्यांच्या सहका-यांनी ठाण्यात चर्चसाठी बैठकीस एका वरिष्ठ अधिका-याने उपस्थिीत राहण्याची मागणी केली आहे.
या संपूर्ण वादाच्या केंद्रस्थानी असलेले सीजेपीचे प्रवक्ते सौरव दास यांनी पुन्हा एकदा संसद मार्ग पोलिस ठाण्याबाहेर धडक दिली आहे. तेथे उपस्थित पोलिसांवर दबाव वाढवत सौरव दास थेट बॅरिकेटवर चढल्याचे पाहायला मिळाले. पिडितेसोबत एक प्रतिनिधी मंडळ सध्या पोलिस ठाण्याच्या आत दाखल झाले आहे. या शिष्टमंडळामध्ये रत्ना सिंह, वृंदा करात, आयशी घोष आणि ऋषभ रंजन हे प्रमुख चेहरे सामील आहेत. एका वरिष्ठ अधिका-याने या संपूर्ण बैठकीत उपस्थित राहावे, अशी ठाम मागणी या नेत्यांनी केली आहे.
आम्ही बळजबरीने आत घुसणार
पोलिसांनी सुरुवातीला सहकार्य न केल्यामुळे सौरव दास अत्यंत आक्रमक झाले होते. त्यांनी प्रशासनाला सज्जड चेतावनी देत म्हटले होते की, पिडिता तिचे वकील आणि आम्ही सर्वजण येथे उपस्थित आहोत, मग पोलीस आमच्याशी चर्चा का करत नाहीत? आम्ही त्यांना दोन-तीन मिनिटांची वेळ दिली आहे, अन्यथा आम्ही बळजबरीने आत घुसणार असा इशारा दिला आहे. त्यांनी पुढे संताप व्यक्त करत सांगितले की, ज्या महिला पत्रकारासोबत एसीपी विवेक भगत यांनी छेडछाड केली आहे, त्या पिडितेला भेटण्यास पोलीस तयार नाहीत; जे अजिबात सहन केले जाणार नाही.
दिल्ली पोलिसांची भूमिका
एका बाजूला निदर्शक आणि आंदोलक सातत्याने संबंधित दोषी एसीपीवर तातडीने कठोर कारवाई करण्याची मागणी करत आहेत, तर दुस-या बाजूला दिल्ली पोलिसांनी यावर आपली बाजू मांडली आहे. पोलिसांच्या मते, याप्रकरणी तीन वेगवेगळया तक्रारी प्राप्त झाल्या आहेत. या सर्व तक्रारी रविवार, ४ ऑक्टोबर रोजी तपासासाठी क्राईम ब्रँचकडे वर्ग करण्यात आल्या आहेत.
