जगातील तिस-या क्रमांकाचे मोठे मैदान राजस्थानमध्ये होणार

अहमदाबादमधील मैदान पहिल्या क्रमांकावर

अहमदाबाद : आंतरराष्ट्रीय क्रिकेटमध्ये येत्या काही वर्षांमध्ये भारतीय क्रिकेटचे महत्त्व अधिक अधोरेखित होणार आहे. मेलबर्न क्रिकेट मैदानाला मागे टाकत अहमदाबाद येथे जगातले सर्वात मोठे क्रिकेट मैदान काही महिन्यांपूर्वी तयार करण्यात आले. या मैदानात १ लाखांपेक्षा जास्त प्रेक्षक बसण्याची क्षमता आहे. मेलबर्नच्या मैदानाची प्रेक्षकक्षमता ही ८० हजार एवढी आहे. यानंतर जगातले तिसरे मोठे क्रिकेट मैदानही भारतात तयार होणार आहे. राजस्थान क्रिकेट असोसिएशनने याबद्दलची घोषणा केली असून, या मैदानाची क्षमता ७५ हजार एवढी असणार आहे.

या मैदानासाठी जयपूर जवळील चौम्प गावाजवळ जमीन निश्चित करण्यात आलेली असून, सुमारे १०० एकर जमिनीवर हे मैदान उभारले जाणार आहे. इनडोअर प्रॅक्टीस, कार पार्किंग यासह अनेक अत्याधुनिक सेवा या मैदानात दिल्या जाणार आहेत. हे मैदान तयार करण्यासाठी ३५० कोटींचा खर्च अपेक्षित असून या मैदानाचे डिजाईन तयार झाल्याचे कळते. राजस्थान क्रिकेट असोसिएशनने दिलेल्या माहितीनुसार हे मैदान दोन टप्प्यांमध्ये बनवलं जाणार आहे.

पहिल्या टप्प्यात ४५ हजार प्रेक्षकांना बसता येईल या पद्धतीने मैदान सुरु करण्यात येईल, यानंतर दुस-या टप्प्यात ही क्षमता ७५ हजारापर्यंत वाढवली जाणार आहे. पहिल्या टप्प्याचे काम हे दोन वर्षांत पूर्ण होईल, असा अंदाज व्यक्त करण्यात येत आहे. राजस्थानमध्ये जयपूर शहरात सध्या ३० हजार आसन क्षमता असलेले मैदान कार्यरत असून या मैदानावर आयपीएलचे सामनेही खेळवले गेले आहेत.

Read More  प्रिया बेर्डेंच्या मनगटावर राष्ट्रवादीचं घड्याळ; ७ जुलैला होणार पक्षप्रवेश