मुंबई : ऐन दिवाळीच्या मुहूर्तावर आपल्या मागण्यांसाठी एसटी प्रवाशांना कोंडीत पकडण्याचा प्रयत्न गोपीचंद पडळकर-सदाभाऊ खोत यांच्या नेतृत्वाखालील संघटनेकडून केला जाण्याची शक्यता आहे. एसटी कर्मचा-यांच्या प्रलंबित मागण्या मान्य कराव्यात, अन्यथा येत्या २८ सप्टेंबरपासून आंदोलन करू असा इशारा सेवा शक्ती संघर्ष एस.टी. कर्मचारी संघटनेने दिला आहे. मुंबईतील मध्यवर्ती कार्यालयासमोर आत्मक्लेश आंदोलन करण्याचा इशारा देण्यात आला आहे.
महाराष्ट्र राज्य मार्ग परिवहन महामंडळातील सेवा शक्ती एस टी कर्मचारी संघटनेने आपल्या प्रलंबित मागण्या निकाली न काढल्यास मोठ्या आंदोलनाचा इशारा दिला आहे. वेतन, भत्ते, ७ वा वेतन आयोग आणि दिवाळी बोनस यांसह विविध मागण्यांवर शासनाने तातडीने निर्णय घ्यावा, अन्यथा २८ सप्टेंबरपासून आक्रमक आंदोलन आणि १ ऑक्टोबरपासून मुंबईतील मुख्यालयासमोर सर्व स्तरांवरील कर्मचारी उतरतील, असा इशारा देण्यात आला आहे.
सेवा शक्ती संघर्ष एसटी कर्मचारी संघटनेचे अध्यक्ष भाजपचे आमदार गोपीचंद पडळकर हे आहेत. तर कार्याध्यक्ष आमदार सदाभाऊ खोत आहेत. २८ सप्टेंबरपासून ‘आक्रमक आंदोलन’ सुरू होणार असून १ ऑक्टोबरपासून मुंबईतील परिवहन मंडळाच्या मुख्यालयासमोर मोठ्या प्रमाणावर कर्मचारी धरणे आंदोलन छेडण्याचा इशारा देण्यात आला आहे. शासनाने वेळेत निर्णय घेतला नाही, तर उद्भवणा-या परिस्थितीची जबाबदारी सरकारवर राहील, असा इशारा संघटनेने दिला.
संघटनेच्या प्रमुख मागण्या
– २००६ पासून शासन कर्मचा-यांप्रमाणे वेतन लागू करावे.
– २०१६ पासून थकीत घरभाडे, भत्ते आणि महागाई भत्ता द्यावा.
– ७ वा वेतन आयोग लागू करावा.
– दिवाळी बोनस २०,००० रुपये द्यावा.
– आंदोलनादरम्यान मृत पावलेल्या कामगारांच्या कुटुंबीयांना ८.५ लाख रुपयांची मदत द्यावी.
– संप काळात दाखल झालेले गुन्हे मागे घ्यावेत.
– रिक्त पदांवर नवीन भरती करावी.
– खासगी बस घेऊ नयेत, राप महामंडळाच्या स्वत:च्या बस वापराव्यात.
– महागाई भत्ता राज्य कर्मचा-यांप्रमाणे ४३% ऐवजी द्यावा.
– २०१५ पासून जी प्रवास भाडेवाढ झाली आहे त्याची पूर्वलक्षीपणे पूर्तता करावी.
– सेवानिवृत्त कर्मचा-यांना एक रकमी लाभ द्यावा.
– राप कर्मचा-यांच्या प्रलंबित आर्थिक प्रश्नांबाबत सोडवणूक न झाल्याने आक्रमक आंदोलन होणार.
– स्थावर मालमत्तेचा मुद्दा
– महामंडळाची स्थावर मालमत्ता उद्योगयोग्यतेच्या धर्तीवर चालवावी किंवा शासनात विलीन करावी, अशी मोठी मागणी संघटनांनी केली आहे.
