वॉशिंग्टन : इराण आणि अमेरिका यांच्यातील सागरी संघर्षाने आता टोक गाठले आहे. सामरिकदृष्ट्या महत्त्वाचे असलेले होर्मुज जलडमरूमध्य (Strait of Hormuz) पार करणाऱ्या इराणच्या ८ मालवाहू जहाजांना अमेरिकन नौदलाने भरसमुद्रात रोखले आहे. अमेरिकेचे राष्ट्राध्यक्ष डोनाल्ड ट्रम्प यांनी लागू केलेल्या कडक सागरी नाकेबंदीमुळे (Naval Blockade) ही जहाजे पुढे जाण्यात अपयशी ठरली असून, ट्रम्प यांनी आखलेली धोरणात्मक ‘लक्ष्मण रेषा’ इराणसाठी मोठी अडचण ठरली आहे.
पाकिस्तानमधील शांतता चर्चा निष्फळ ठरल्यानंतर, १३ एप्रिल २०२६ पासून अमेरिकेने इराणच्या सर्व बंदरांची पूर्णपणे नाकेबंदी करण्याची घोषणा केली. इराणच्या ८ जहाजांनी होर्मुजची सामुद्रधुनी ओलांडून आंतरराष्ट्रीय जलक्षेत्रात प्रवेश करण्याचा प्रयत्न केला. मात्र, आधीच तैनात असलेल्या अमेरिकन युद्धनौकांनी त्यांना घेराव घालून त्यांची वाट रोखली.
राष्ट्राध्यक्ष ट्रम्प यांनी स्पष्ट इशारा दिला आहे की, “जर कोणत्याही इराणी जहाजाने ही नाकेबंदी तोडण्याचा प्रयत्न केला, तर त्याला तात्काळ नष्ट केले जाईल.” ट्रम्प यांनी दावा केला आहे की, इराणची १५८ जहाजे याआधीच युद्धात नष्ट झाली आहेत. अमेरिकेच्या या दबावामुळे इराणकडे जाणारी अनेक व्यापारी जहाजे अर्ध्यातूनच मागे फिरली आहेत. इराणने याला ‘सागरी चाचेगिरी’ म्हटले असून प्रतिहल्ला करण्याची धमकी दिली आहे.
