बारामती : प्रतिनिधी
उपमुख्यमंत्री सुनेत्रा अजित पवार यांनी गुरुवारी बारामतीत विकासकामांच्या पाहणीसाठी जात असताना रस्त्यावर झालेल्या अपघातात जखमी झालेल्या विद्यार्थिनीला तातडीने मदत करत माणुसकीचे दर्शन घडवले. अपघातग्रस्त तरुणीला पाहताच त्यांनी आपला ताफा थांबवला, तिची विचारपूस करत रुग्णालयात दाखल केले.
मिळालेल्या माहितीनुसार, जळोची एमआयडीसी रस्त्यावर एका विद्यार्थिनीला टेम्पोची धडक बसली. धडकेनंतर ती वाहनासह रस्त्यावर पडून जखमी झाली होती. त्याचवेळी विकासकामांच्या पाहणीसाठी जाणारा सुनेत्रा पवार यांचा ताफा तेथून जात होता. अपघाताचे दृश्य दिसताच त्यांनी त्वरित गाडी थांबवून घटनास्थळी धाव घेतली.
सुनेत्रा पवार यांनी जखमी विद्यार्थिनीच्या प्रकृतीबाबत जाणून घेत संबंधित अधिकारी आणि सहका-यांना तातडीने मदत करण्याच्या सूचना दिल्या. त्यांनी स्वत: रुग्णालयात दाखल करण्याची व्यवस्था केली. तसेच उपचारात कोणतीही अडचण येऊ नये म्हणून आपले स्वीय सहाय्यक सुनीलकुमार मुसळे यांनाही रुग्णालयात पाठवत उपचारांवर लक्ष ठेवण्याचे निर्देश दिले.
त्यांच्या या तत्पर आणि संवेदनशील भूमिकेचे घटनास्थळी उपस्थित नागरिकांनी कौतुक केले. संकटाच्या क्षणी मदतीसाठी धावून जाण्याची ही कृती पाहून अनेकांना दिवंगत अजितदादा पवार यांच्या जनसंपर्काची आणि संवेदनशील कार्यशैलीची आठवण झाल्याची प्रतिक्रिया नागरिकांनी व्यक्त केली. अजितदादांनी जपलेला लोकाभिमुख वारसा सुनेत्रा पवार समर्थपणे पुढे नेत असल्याची भावना यावेळी अनेकांनी बोलून दाखवली.
दरम्यान, बुधवारी अजितदादांच्या जयंतीनिमित्त सुनेत्रा पवार यांनी विद्या प्रतिष्ठान येथे त्यांच्या स्मृतिस्थळाला अभिवादन केले. त्यानंतर गोजुबावी येथील त्या धावपट्टीवर जाऊनही त्यांनी श्रद्धांजली वाहिली, जिथे २८ जानेवारी २०२६ रोजी झालेल्या विमान दुर्घटनेत अजितदादा पवार यांचे निधन झाले होते. त्याच दिवशी त्यांनी सोशल मीडियावर भावूक पोस्ट शेअर करत, ‘दादा, तुमचा वाढदिवस आज जयंती म्हणून साजरा करावा लागत आहे, हे सत्य अजूनही मन स्वीकारायला तयार नाही’, अशा शब्दांत आपल्या भावना व्यक्त केल्या होत्या.
