माहूर (विशेष प्रतिनिधी): धार्मिक आणि ऐतिहासिक महत्त्व असलेल्या माहूर गडाच्या पायथ्याशी एक थरारक घटना समोर आली आहे. माहूर शहराला लागूनच असलेल्या प्रसिद्ध बाबा सोनापीर दर्गाह परिसरात काल रात्री एका बिबट्याने आपल्या दोन पिल्लांसह मुक्त संचार केल्याने परिसरात प्रचंड खळबळ उडाली आहे. बिबट्या इतक्या जवळ आल्याचे पाहून दर्गा परिसरात रात्री मुक्कामी असलेल्या भाविक आणि मुजावर (दर्ग्याची देखरेख करणारे) परिवाराची अक्षरशः पाचावर धारण बसली होती. कसाबसा हा बिबट्या पुन्हा जंगलाच्या दिशेने गेल्याने अनर्थ टळला.
मध्यरात्री कोल्ह्याची शिकार अन् पाठलाग
माहूर शहराला लागूनच घनदाट जंगल असल्याने या परिसरात वाघ, बिबट्या, अस्वल, रोही, लांडगे आणि कोल्हे यांसारख्या वन्यजीवांचा वावर नेहमीच असतो. मात्र, दि. २१ मे रोजी रात्री १२:३० वाजताच्या सुमारास एक वेगळाच थरार नागरिकांनी डोळ्यांनी पाहिला. दर्ग्याचे मुजावर बाबर अहमद यांचे भाऊ काही कामानिमित्त बाहेरगावाहून परत आले होते. रात्रीच्या वेळी गाडीच्या उजेडात त्यांना दर्ग्याला लागूनच एक बिबट्या मादी जाताना दिसली. ही बिबट्या मादी एका कोल्ह्याची शिकार करून त्याला घेऊन जात होती. परंतु, अचानक गाडीचा उजेड आणि हालचाल झाल्यामुळे कोल्हा बिबट्याच्या तावडीतून सुटला आणि जीव वाचवण्यासाठी पळाला. यानंतर कोल्हा पुढे आणि त्याच्या मागे बिबट्याची दोन लहान पिल्ले धावत असल्याचा कमालीचा थरार मुजावर यांनी अत्यंत जवळून अनुभवला.
वन विभागाची उदासीनता; नागरिकांनी जागून काढली रात्र
बिबट्या पिल्लांसह अगदी दर्ग्याच्या भिंतीजवळ वावरत असल्याचे स्पष्ट झाल्यानंतर दर्गा परिसरात भीतीचे वातावरण पसरले. मुजावर कुटुंब आणि तेथे थांबलेल्या भाविकांनी तातडीने वन विभागाच्या अधिकारी व कर्मचाऱ्यांना दूरध्वनीवरून (फोन करून) संपर्क साधण्याचा प्रयत्न केला. मात्र, नेहमीप्रमाणे वन विभागाकडून कुठलाच प्रतिसाद मिळाला नाही.गावकऱ्यांमध्ये तीव्र संताप: वन कर्मचाऱ्यांनी फोन न उचलल्याने किंवा दखल न घेतल्याने दर्ग्यावरील भाविक आणि मुजावर परिवाराला प्रचंड असुरक्षित वाटू लागले. बिबट्या पुन्हा हल्ला करेल या भीतीने लहान मुलांसह कुटुंबातील सर्व सदस्यांनी संपूर्ण रात्र जागून काढली. कसाबसा गोंधळ घालून बिबट्याला जंगलाच्या दिशेने हाकलण्यात आले. ऐन उन्हाळ्यात पाण्यासाठी वन्यजीव मानवी वस्तीकडे वळत आहेत. दर्गा परिसरात रोज शेकडो भाविक दर्शनासाठी येतात, अशा वेळी वन विभागाने येथे गस्त वाढवावी आणि नागरिकांच्या सुरक्षेची काळजी घ्यावी, अशी मागणी आता माहूर शहरातून जोर धरत आहे.
