बालासोर : संरक्षण संशोधन आणि विकास संस्था (डीआरडीओ)ने बुधवार दि. ३१ डिसेंबर रोजी ओडिशाच्या किना-याजवळ प्रलय क्षेपणास्त्राची यशस्वी चाचणी केली. यावेळी एकाच लाँचरमधून खूप कमी वेळेच्या अंतराने दोन प्रलय क्षेपणास्त्रे (सल्वो लॉन्च) डागण्यात आली.
संरक्षण मंत्रालयाच्या माहितीनुसार, ही चाचणी लष्कराच्या वापराशी संबंधित तपासणीचा (यूजर इवैल्यूएशन ट्रायल) भाग होती. दोन्ही क्षेपणास्त्रे ठरलेल्या मार्गावर योग्य प्रकारे उडाली आणि यशस्वीरित्या लक्ष्ये पूर्ण केली. क्षेपणास्त्रांच्या संपूर्ण उड्डाणावर लक्ष ठेवण्यासाठी ओडिशाच्या चांदीपूर येथील इंटिग्रेटेड टेस्ट रेंज (आयटीआर) चे सेन्सर्स लावण्यात आले होते. संरक्षण मंत्रालयाने याला भारताच्या सामरिक क्षेपणास्त्र क्षमतेसाठी एक महत्त्वपूर्ण यश म्हटले आहे. प्रलय क्षेपणास्त्र पूर्णपणे स्वदेशी असून संरक्षण संशोधन आणि विकास संस्थेने (डीआरडीओ) ते विकसित केले आहे.यापूर्वी, डीआरडीओने २८ आणि २९ जुलै २०२५ रोजी ओडिशाच्या किना-याजवळील डॉ. एपीजे अब्दुल कलाम बेटावर प्रलय क्षेपणास्त्राच्या दोन यशस्वी उड्डाण चाचण्या केल्या होत्या. या चाचण्या देखील लष्कर आणि हवाई दलाच्या वापराच्या तपासणीसाठी (यूजर इवैल्यूएशन ट्रायल) करण्यात आल्या होत्या.
गत आठवड्यात के-४ बॅलिस्टिक
क्षेपणास्त्राची यशस्वी चाचणी
भारताने २३ डिसेंबर रोजी बंगालच्या उपसागरात न्यूक्लियर पावर्ड पाणबुडी आयएनएस अरिघाटमधून ३,५०० किलोमीटर पल्ल्याच्या के-४ बॅलिस्टिक क्षेपणास्त्राची यशस्वी चाचणी केली होती. ही चाचणी विशाखापट्टणमच्या किना-याजवळ करण्यात आली. भारत आता जमीन, हवा यानंतर समुद्रातूनही अणुबॉम्ब प्रक्षेपित करू शकेल.
‘‘के’’ अक्षर डॉ. कलाम यांच्या सन्मानार्थ
हे क्षेपणास्त्र २ टनांपर्यंत अणुवॉरहेड वाहून नेण्यास सक्षम आहे. के-मालिकांच्या क्षेपणास्त्रांमध्ये ‘‘के’’ हे अक्षर डॉ. एपीजे अब्दुल कलाम यांच्या सन्मानार्थ ठेवण्यात आले आहे. त्यांची भारताच्या क्षेपणास्त्र कार्यक्रमात महत्त्वाची भूमिका राहिली आहे.
