वॉशिंग्टन/तेहरान: मध्यपूर्वेतील तणाव निवळण्यासाठी अमेरिकेने दिलेल्या युद्धविरामाच्या प्रस्तावाला इराणने प्रतिसाद दिला आहे. मात्र, इराणने ठेवलेल्या अटी आणि दिलेल्या प्रतिसादावर अमेरिकेचे राष्ट्राध्यक्ष डोनाल्ड ट्रम्प यांनी तीव्र नाराजी व्यक्त केली असून, हा प्रतिसाद “पूर्णपणे अमान्य” (Totally Unacceptable) असल्याचे म्हटले आहे. यामुळे गेल्या काही काळापासून सुरू असलेल्या या संघर्षावर तोडगा निघण्याची शक्यता पुन्हा एकदा मावळली आहे.
मिळालेल्या माहितीनुसार, इराणने पाकिस्तानी मध्यस्थांमार्फत आपला प्रतिसाद अमेरिकेला पाठवला होता. इराणने या युद्धविरामासाठी काही प्रमुख मागण्या ठेवल्या होत्या, ज्यामध्ये लेबनॉनसह सर्व आघाड्यांवर युद्ध थांबवणे आणि सागरी सुरक्षेची हमी देणे यांचा समावेश होता. मात्र, अमेरिकेच्या प्रस्तावात इराणचा आण्विक कार्यक्रम मागे घेणे आणि हॉर्मुझची सामुद्रधुनी पुन्हा खुली करणे यांसारख्या अटींचा समावेश होता.
सोशल मीडियावर आपली भूमिका स्पष्ट करताना डोनाल्ड ट्रम्प म्हणाले की, “इराण गेल्या ५० वर्षांपासून अमेरिकेसोबत खेळ खेळत आहे, पण आता हे जास्त काळ चालणार नाही. त्यांचा हा प्रतिसाद आम्हाला कोणत्याही परिस्थितीत मान्य नाही.” ट्रम्प यांच्या या भूमिकेमुळे दोन्ही देशांमधील लष्करी तणाव पुन्हा वाढण्याची भीती व्यक्त केली जात आहे.
एकीकडे मुत्सद्दी स्तरावर चर्चा सुरू असतानाच, दुसरीकडे आखाती देशांच्या परिसरात ड्रोन हल्ल्यांच्या घटना वाढल्या आहेत. कतार आणि संयुक्त अरब अमिरातीच्या (UAE) हद्दीत ड्रोन घुसल्याच्या बातम्या समोर आल्या आहेत. दरम्यान, इराणचे नवे सर्वोच्च नेते मोजताबा खामेनी यांनी लष्करी अधिकाऱ्यांची बैठक घेऊन शत्रूचा सामना करण्यासाठी नवीन निर्देश दिले आहेत. या घडामोडींमुळे जागतिक बाजारपेठेत कच्च्या तेलाच्या किमतीवर परिणाम होण्याची शक्यता असून, संपूर्ण जगाचे लक्ष आता अमेरिकेच्या पुढील पावलाकडे लागले आहे.
