मुंबई : महाराष्ट्र लोकसेवा आयोगाने(एमपीएससी) राज्यसेवा मुख्य परीक्षा २०२४ चा निकाल जाहीर केला असून सोलापूरच्या विजय नागनाथ लमकणे यांनी राज्यात पहिला क्रमांक पटकावत इतिहास घडवला आहे. त्यांच्या या यशामुळे सोलापूर जिल्ह्यात आनंदाचे वातावरण निर्माण झाले आहे. गुरुवारी रात्री उशिरा आयोगाने हा निकाल प्रसिद्ध केला.
एमपीएससीतर्फे २७ ते २९ मे २०२४ या कालावधीत राज्यसेवा मुख्य परीक्षा घेण्यात आली होती. त्यानंतर पात्र उमेदवारांच्या मुलाखती ३० ऑक्टोबरपर्यंत घेण्यात आल्या. मुलाखती संपल्यानंतर रात्री उशिरा निकाल जाहीर करण्यात आला. एकूण १,५१६ उमेदवार मुलाखतीसाठी पात्र ठरले होते.
या निकालात हिमालय घोरपडे यांनी दुसरा क्रमांक, तर नागपूरच्या प्रगती जगताप हिने अनुसूचित जाती (एससी) प्रवर्गातून राज्यात पहिला क्रमांक पटकावला आहे. विशेष म्हणजे, विजय लमकणे हे आधीच एमपीएससीच्या माध्यमातून विविध सेवांमध्ये निवड झालेले अधिकारी असून सध्या ते गटविकास अधिकारी म्हणून कार्यरत आहेत.
महिलांची उल्लेखनीय कामगिरी
यंदाच्या राज्यसेवा परीक्षेत महिलांनीही उल्लेखनीय कामगिरी केली आहे. मुलींमधून आरती जाधव या राज्यात पहिल्या आल्या आहेत, तर अनुसूचित जाती (एससी) प्रवर्गातून प्रगती जगताप यांनी पहिला क्रमांक मिळवला आहे. प्रगती जगताप सध्या नागपूर जिल्ह्यातील कळमेश्वर येथे गटविकास अधिकारी म्हणून कार्यरत आहेत. या निकालात अनेक उमेदवारांनी आपले स्वप्न पूर्ण केले असून महाराष्ट्रभरातून अभिनंदनांचा वर्षाव होत आहे. विशेषत: सोलापूरच्या विजय लमकणे यांच्या राज्यात पहिल्या क्रमांकाच्या कामगिरीमुळे स्थानिकांसह विद्यार्थ्यांमध्ये उत्साहाचे वातावरण निर्माण झाले आहे. त्यांच्या यशाने अनेक स्पर्धा परीक्षेची तयारी करणा-या तरुणांना प्रेरणा मिळाली आहे.
