न्यूयॉर्क : चांद्रयान-३ चंद्रावर पोहोचून ५ महिने झाले आहेत. दरम्यान, आता अशी बातमी आहे की अंतराळ संस्था नॅशनल एरोनॉटिक्स स्पेस अॅडमिनिस्ट्रेशनने चंद्रावरील विक्रम लँडरशी संपर्क साधला आहे. अंतराळ संशोधनाच्या दृष्टीकोनातून हे अत्यंत महत्त्वाचे ठरू शकते, असे बोलले जात आहे. नासाच्या एका यानाने चंद्राच्या पृष्ठभागावर भारतीय अंतराळ संशोधन संस्थेच्या चांद्रयान-३ ला संदेश पाठवला आहे.
नासाच्या म्हणण्यानुसार, चंद्राच्या पृष्ठभागावर परिभ्रमण करत असलेल्या अंतराळ यान आणि विक्रम लँडर दरम्यान एक लेझर बीम प्रसारित आणि परावर्तित झाला. या प्रयोगाच्या यशामुळे चंद्राच्या पृष्ठभागावरील लक्ष्यांचा अचूक शोध घेण्याचा मार्ग मोकळा झाल्याचे अवकाश संस्थेचे म्हणणे आहे. नासाने एका निवेदनात म्हटले आहे की, १२ डिसेंबर २०२३ रोजी दुपारी ३ वाजता (ईएसटी), नासाच्या लूनार रेकॉन ऑर्बिटर(एलआरओ)ने त्याचे लॅटरल अल्टिमीटर इन्स्ट्रुमेंट विक्रमच्या दिशेने निर्देशित केले. जेव्हा एलआरओने लेसर पल्स त्याच्या दिशेने प्रसारित केले तेव्हा लँडर एलआरओपासून १०० किलोमीटर अंतरावर, चंद्राच्या दक्षिण ध्रुव प्रदेशातील मँगिनस क्रेटरजवळ होता. जेव्हा ऑर्बिटरने विक्रमवर बसवलेल्या नासाच्या छोट्या रेट्रोरिफ्लेक्टरमधून परत आलेला प्रकाश रेकॉर्ड केला तेव्हा नासाच्या शास्त्रज्ञांना माहित होते की त्यांचे तंत्र काम करत आहे.
चंद्राच्या पृष्ठभागावर शोधाचा रस्ता खुला
इस्रोने सांगितले की एलआरओने चंद्रावर फिड्युुशियल पॉइंट (अचूक मार्कर) म्हणून काम करण्यास सुरुवात केली आहे. रिफ्लेक्टर बनविणा-या नासाच्या टीमचे प्रमुख झियाओली सन म्हणाले की, या यशामुळे चंद्राच्या पृष्ठभागावर लक्ष्य शोधण्याच्या नवीन शैलीचा रस्ता खुला झाला आहे.
लेझरव्दारे मागोवा घेणे सामान्य
लेझरद्वारे पृथ्वीवरील उपग्रहांचा मागोवा घेणे सामान्य आहे, परंतु त्या तंत्रज्ञानाचा वापर करून अंतराळातून पृष्ठभागावर वाहने शोधणे खूप खास आहे. यामुळे चंद्रावर सुरक्षित लँडिंगचा मार्ग मोकळा होऊ शकतो. नासाच्या म्हणण्यानुसार, या तंत्रज्ञानाचा भविष्यात अनेक प्रकारे वापर केला जाऊ शकतो. अंतराळवीरांना मार्गदर्शन करण्यापासून ते तळाजवळील पुरवठा जहाजांच्या स्वयंचलित लँडिंगपर्यंतचे उपयोग शक्य आहेत.
