तेहरान : मध्य पूर्वेतील युद्ध अधिकच चिघळत आहे. शनिवारी, इराणने हिंद महासागरातील अमेरिका आणि ब्रिटनच्या लष्करी तळ असलेल्या डिएगो गार्सियावर दोन मध्यम पल्ल्याची बॅलिस्टिक क्षेपणास्त्रे डागली. या हल्ल्यानंतर लगेचच दुबईतील हवाई संरक्षण यंत्रणा कार्यान्वित करण्यात आली आणि मोठ्या स्फोटांचे आवाज ऐकू आले. हिंद महासागरातील हे युद्ध अमेरिकेच्या पाणबुडीने इराणची युद्धनौका इरिस देना बुडवल्यानंतर आणखी वाढले आहे. अमेरिकेच्या या हल्ल्यात ८५ हून अधिक जवानांचा मृत्यू झाला होता.
वॉल स्ट्रीट जर्नलने दिलेल्या वृत्तानुसार, इराणने शनिवारी हिंद महासागरातील अमेरिका-ब्रिटनच्या संयुक्त लष्करी तळ असलेल्या डिएगो गार्सियावर दोन बॅलिस्टिक क्षेपणास्त्रे डागली. इराणच्या भूभागापासून सुमारे ४,००० किलोमीटर अंतरावर असलेल्या या तळावरील हा आतापर्यंतचा सर्वात मोठा हल्ला आहे. इराणने डागलेली दोन्ही क्षेपणास्त्रे हवेतच पाडण्यात आल्याचे अमेरिकन अधिका-यांनी सांगितले आहे.
अधिका-यांनी सांगितले की, एक क्षेपणास्त्र हवेतच निकामी झाले, तर दुसरे अमेरिकेच्या युद्धनौकेवरून डागलेल्या एका इंटरसेप्टर क्षेपणास्त्राने नष्ट केले. डिएगो गार्सिया हे चागोस बेटांमध्ये वसलेले आहे. ते एक महत्त्वाचे अमेरिका-ब्रिटन लष्करी तळ आहे, याचा उपयोग अफगाणिस्तान आणि इराकमधील अमेरिकेच्या बॉम्बहल्ला मोहिमांसाठी एक तळ म्हणून केला आहे.
इराणकडे युरोपीय देशांना लक्ष्य करण्याची क्षमता
इराणने डिएगो गार्सियाला लक्ष्य केल्यामुळे लष्करी तज्ज्ञांमध्ये चिंता वाढली आहे. आतापर्यंत इराणच्या क्षेपणास्त्रांची मारक क्षमता मर्यादित मानली जात होती, पण या हल्ल्यामुळे आता इराणकडे युरोपीय देशांना लक्ष्य करण्याची क्षमता असल्याचे दिसत आहे. पेंटागॉनने अद्याप अधिकृत निवेदन जारी केलेले नाही, परंतु रणनीतीकारांच्या मते यामुळे युद्धाचे स्वरूप पूर्णपणे बदलले आहे.
माजी केंद्रीय मंत्र्यांनी चिंता व्यक्त केली
माजी केंद्रीय मंत्री मनीष तिवारी यांनी ‘एक्स’ या सोशल मीडिया प्लॅटफॉर्मवर या घटनेबद्दल चिंता व्यक्त केली. त्यांनी म्हटले की, जर इराणने डिएगो गार्सियावर हल्ला करण्याचा प्रयत्न केला असेल, तर त्यामुळे युद्धाची व्याप्ती लक्षणीयरीत्या वाढली आहे. तिवारी यांच्या मते, इराणने पश्चिमेला एक स्पष्ट संदेश दिला आहे की ते मध्य-पूर्वेच्या पलीकडे आणि दक्षिणेकडेही हल्ला करू शकतात.
