छत्रपती संभाजीनगर : प्रतिनिधी
छत्रपती संभाजीनगर येथे प्रसारमाध्यमांशी संवाद साधताना शिवसेनेचे नेते आणि मंत्री संजय शिरसाट यांनी ५०० कोटींच्या कथित ऑडिओ क्लिप प्रकरणावरून आक्रमक भूमिका घेतली आहे. या वादामध्ये नेमके पैसे कुणी घेतले आणि कुणी आणले याबाबत चर्चा सुरू असून, ऑडिओ क्लिपमधील आवाजावरून वाद सुरू झाला आहे. आम्ही यापूर्वीच या प्रकरणाची फॉरेन्सिक चौकशी करण्याची मागणी केली असून, हा आवाज नेमका कुणाचा आहे हे सर्वजण जाणून आहेत, असं संजय शिरसाट यांनी म्हटले आहे.
५०० कोटींच्या प्रकरणातील व्हायरल होत असलेल्या ऑडिओ क्लिपबद्दल बोलताना संजय शिरसाट म्हणाले की, एवढी खासगी टेप बाहेर येतेच कशी आणि ती बाहेर आणणारे नेमके कोण आहेत? आतापर्यंत ज्यांच्या आवाजाबाबत चर्चा आहे त्यांनी हा आमचा आवाज नाही असा दावा केलेला नाही, त्यामुळे आम्हालाही यावर संशय आहे. महायुतीमध्ये भांडण लावणारे आणि कटकारस्थान रचणारे ‘अस्तीनातले साप’ नेमके कोण आहेत, हे समोर आले पाहिजे. या प्रकरणाची सखोल चौकशी होऊ द्या, त्यानंतर ज्याचे नाव समोर येईल त्याला आणि गरज पडल्यास भाजपला देखील जाब विचारणार आहोत. मात्र, यातून आम्ही एकमेकांचे कपडे फाडणार नाही, असे त्यांनी स्पष्ट केले.
दादरमध्ये फुगड्या घाला, नाचायला कमी पडल्यास मुसाला बोलवा
या प्रकरणावरून शिवसेना उद्धव बाळासाहेब ठाकरे पक्षाचे नेते आणि खासदार संजय राऊत यांच्यावर हल्लाबोल करताना संजय शिरसाट म्हणाले की, महायुतीमध्ये कोणताही वाद नाही. मात्र, दुस-याचे घर जळत असल्याचे पाहून संजय राऊतांना आनंद होतो. त्यांना इतकाच आनंद झाला असेल तर त्यांनी दादरमध्ये येऊन पेढे वाटावे आणि फुगड्या घालाव्यात. जर नाचायला माणसे कमी पडत असतील तर त्यांनी मुसाला बोलवावे, अशा शब्दांत त्यांनी राऊतांच्या टीकेचा समाचार घेतला.
राजकीय घडामोडींवर रोखठोक भाष्य
प्रत्येक प्रश्नाला उत्तर देत बसल्यास राजकारणात कुणीही कमी नाही, प्रत्येकाला टोकाचे बोलता येते; मात्र आता हे थांबवले पाहिजे कारण सर्वसामान्य लोकांकडून नाराजी व्यक्त होत आहे. रामदास कदम हे ज्येष्ठ नेते आहेत, त्यांनी आपली भूमिका मांडली असून पक्षप्रमुख एकनाथ शिंदे यांनी त्याची दखल घेतली आहे.
















