रेणापूर : रेणापूर शहरासह संपूर्ण तालुक्यातील ग्रामीण भागात सध्या रानडुकरांचा उपद्रव कमालीचा वाढला असून यामुळे शेतकरी वर्गात प्रचंड चिंतेचे वातावरण निर्माण झाले आहे. हे वन्यप्राणी रात्रीच्या वेळी कळपाने शेतात घुसून उभ्या पिकांची मोठ्या प्रमाणावर नासधूस करत आहेत. यामुळे आधीच संकटात असलेल्या शेतकऱ्यांचे अतोनात आर्थिक नुकसान होत आहे. रेणापूर येथील प्रगतशील शेतकरी पंडित आबासाहेब माने हे दरवर्षी रासायनिक खतांचा अत्यंत मर्यादित वापर करून ऊसाचे विक्रमी उत्पादन घेणारे शेतकरी म्हणून संपूर्ण पंचक्रोशीत परिचयाचे आहेत. मात्र यंदा जून महिना सुरू होऊन वीस दिवस उलटून गेले तरी समाधानकारक पाऊस न झाल्याने पंडित माने यांच्यासह तालुक्यातील सर्वच शेतकरी आधीच मोठ्या संकटात सापडले आहेत.
दुष्काळी परिस्थिती सदृश वातावरण असतानाही शेतकरी उपलब्ध असलेल्या थोड्याफार पाण्यावर अत्यंत कष्टाने आपल्या ऊस पिकाची जोपासना करत आहेत. मात्र अशा कठीण परिस्थितीत आता रात्रीच्या वेळी रानडुकरांचा वावर कमालीचा वाढला आहे. हे रानडुकरे ऊसाच्या फडांमध्ये घुसून ऊस उपसून टाकणे, तोडणे आणि पीक पायाखाली तुडवून फस्त करणे अशा प्रकारे पिकाचे अतोनात नुकसान करत असल्याचे चित्र समोर आले आहे. रानडुकरांच्या या वाढत्या त्रासाला कंटाळून तालुक्यातील काही भागांतील शेतकऱ्यांनी आपल्या पिकांच्या संरक्षणासाठी आता रात्रीच्या वेळी टॉर्च आणि काठ्या घेऊन थेट शेतातच पहारा देण्यास सुरुवात केली आहे. मात्र तरीही या वन्यप्राण्यांचा उपद्रव थांबताना दिसत नाही.
या वाढत्या वन्यप्राण्यांच्या संकटामुळे तालुक्यातील शेतकरी पूर्णपणे हवालदिल झाले असून त्यांच्यात वन विभागाच्या कारभाराविरुद्ध तीव्र संताप व्यक्त होत आहे. वन विभागाने या गंभीर समस्येकडे त्वरित लक्ष देऊन तातडीने बाधित क्षेत्राची पाहणी करावी आणि रानडुकरांचा बंदोबस्त करण्यासाठी योग्य त्या प्रतिबंधात्मक उपाययोजना कराव्यात, अशी मागणी जोर धरू लागली आहे. तसेच ज्या शेतकऱ्यांच्या पिकांचे या रानडुकरांनी नुकसान केले आहे, त्या नुकसानग्रस्त शेतकऱ्यांच्या शेतावर जाऊन प्रशासनाने तत्काळ पंचनामे करावेत आणि त्यांना शासकीय नियमानुसार योग्य ती आर्थिक नुकसानभरपाई मिळवून द्यावी, अशी आग्रही मागणी आता रेणापूर तालुक्यातील शेतकरी वर्गातून केली जात आहे.
