नवी दिल्ली : वृत्तसंस्था
आज दिल्ली उच्च न्यायालयात पूजा खेडकरच्या अटकपूर्व जामीन प्रकरणी सुनावणी झाली. या सुनावणीत ‘युपीएससी’ने प्रतिज्ञापत्र दाखल करून पूजा खेडकरच्या जामिनाला विरोध केला आहे. ‘युपीएससी’ने आपल्या प्रतिज्ञापत्रात स्पष्ट केले की, पूजा खेडकरला जामीन देणे उचित नाही कारण तिच्या चौकशीसाठी तिला ताब्यात घेणे अत्यंत आवश्यक आहे.
‘युपीएससी’ने प्रतिज्ञापत्रात म्हटले आहे की, पूजा खेडकरने बनावट कागदपत्रे तयार करून २०२२ च्या आयएएस परीक्षेत निवड होण्यासाठी कोणाची मदत घेतली हे अटक केल्यानंतरच स्पष्ट होईल. त्यामुळे या प्रकरणात आवश्यक पुरावे गोळा करण्यासाठी चौकशी करणे गरजेचे आहे. ‘युपीएससी’च्या मते, पूजाची अटक आणि चौकशी या प्रकरणाच्या तपासासाठी महत्त्वपूर्ण आहे, कारण या चौकशीतूनच या प्रकरणातील खरे सत्य उघड होईल.
उच्च न्यायालयाचा निर्णय : पूजा खेडकरच्या अटकपूर्व जामीनाची तारीख २९ ऑगस्टपर्यंत वाढवली आहे. खेडकरच्या वकिलाने कोर्टाला सांगितले की, ‘युपीएससी’ने दि. २० ऑगस्ट रोजी आपल्या प्रतिज्ञापत्रात प्रतिसाद दिला आहे, त्यामुळे त्याचा अभ्यास करण्यासाठी थोडा वेळ आवश्यक आहे. दिल्ली हायकोर्टाने खेडकरच्या अटकपूर्व जामीन प्रकरणात पुढील निर्णयावर अद्याप शिक्कामोर्तब केलेले नाही. २९ ऑगस्टच्या सुनावणीसाठी या प्रकरणाच्या पुढील प्रक्रियेसाठी प्रतीक्षा करावी लागेल.
