नवी दिल्ली : आयसीसी टी-२० वर्ल्ड कप २०२४ स्पर्धेतील सेमी फायनलमध्ये पोहोचण्यासाठी टीम इंडिया सज्ज झाला आहे. टीम इंडिया आणि बांगलादेश यांच्यात आज सुपर ८ फेरीतील दुसरा सामना होणार आहे. या सामन्याला रात्री ८ वाजता सुरुवात होणार आहे. तर ७ वाजून ३० मिनिटांनी टॉस होणार आहे. टीम इंडियाने सुपर ८ मधील पहिला सामना जिंकल्याने भारतीय संघ उत्साहात असून, आजच्या सामन्यात भारताला विजय मिळवून उपान्त्य फेरी गाठण्याची संधी आहे तर दुसरीकडे सुपर ८ मधील पहिला सामना गमावल्याने आता बांगलादेशची ‘करो या मरो’अशी स्थिती आहे.
टीम इंडिया या स्पर्धेत अजिंक्य आहे. टीम इंडियाने साखळी फेरीतील ३ सामने जिंकले, तर १ सामना पावसामुळे रद्द झाला. तर दुस-या बाजूला बांगलादेशने ३ सामने जिंकले. तर एका सामन्यात पराभव झाला. त्यानंतर टीम इंडियाने सुपर ८ मधील पहिल्या सामन्यात अफगाणिस्तानला धूळ चारली. बांगलादेशला सुपर ८ मधील आव्हान कायम ठेवायचे असेल, तर कोणत्याही परिस्थितीत टीम इंडियाविरुद्ध जिंकावे लागणार आहे. तर भारतीय संघाला या विजयासह उपान्त्य फेरीचे तिकिट मिळवायचे आहे. यामुळे आजचा सामना चुरशीचा होणार आहे.
