पुणे : प्रतिनिधी
‘मुख्यमंत्री माझी लाडकी बहीण’ योजनेच्या निकषात न बसणा-यांची संख्या अधिक असण्याची शक्यता आहे. त्यामुळे निकषात न बसणा-या ‘बहिणीं’नी योजनेतून नाव कमी करण्यासाठी स्वत:हून पुढाकार घ्यावा आणि महिला-बाल कल्याण विभागाच्या लेखाशीर्षावर पैसे भरावेत, अशी सूचना महिला व बाल कल्याण विभागाचे सचिव अनुपकुमार यांनी केली आहे. त्यामुळे योजनेतील लाभार्थ्यांना कात्री लागणार असल्याचे स्पष्ट झाले आहे.
‘लाडकी बहीण’ योजनेतील लाभार्थ्यांना डिसेंबरच्या मध्यापर्यंत निधी वितरित करण्यात आला नव्हता. त्यामुळे योजनेतील निकषांत न बसणा-या ‘बहिणीं’ची तपासणी करण्यात येणार असल्याच्या चर्चांना वेग आला होता. मात्र, महिला व बाल कल्याण विभाग मंत्री अदिती तटकरे यांनी ‘लाडक्या बहिणीं’ची तपासणी होणार नसल्याचे स्पष्ट केले होते.
‘ज्या महिला योजनेच्या निकषात बसत नाहीत, त्यांनी स्वत:हून आपले नाव मागे घ्यावे; अन्यथा दंडासह रक्कम वसूल केली जाईल,’ असे वक्तव्य माजी मंत्री छगन भुजबळ यांनी रविवारी केले होते. त्यामुळे ‘लाडकी बहीण’ योजनेच्या लाभार्थ्यांमध्ये खळबळ उडाली. या पार्श्वभूमीवर महिला व बाल कल्याण विभागाचे सचिव अनुपकुमार यांनी राज्यातील सर्व जिल्हा महिला व बाल कल्याण विभागाच्या अधिका-यांशी ‘व्हीडीओ कॉन्फरन्सिंग’द्वारे संवाद साधला.
‘लेक लाडकी’ योजनेसाठी राज्याला सुमारे अडीच लाख लाभार्थ्यांचे उद्दिष्ट देण्यात आले आहे. योजनेसाठी जिल्ह्यांतून आलेल्या अर्जांना मान्यता देऊन रक्कम संबंधित मुलीच्या खात्यावर जमा करावी; तसेच आणखी मुलींचे अर्ज मागवावेत, अशीही सूचना महिला व बाल कल्याण विभागाचे सचिव अनुपकुमार यांनी केल्याचे सूत्रांनी सांगितले.
योजनेचे निकष काय?
लाभार्थी महिलेचे वय १८ ते ६५ च्या दरम्यान असावे. कुटुंबाचे वार्षिक उत्पन्न अडीच लाखांच्या आत असावे. कुटुंबातील कोणताही सदस्य सरकारी नोकरीत नसावा; तसेच प्राप्तिकर भरणार नसावा. संजय गांधी निराधार योजनेसारख्या अन्य कोणत्याही योजनेचा लाभ घेतलेला नसावा. चारचाकी वाहने असणा-या महिला योजनेच्या लाभार्थी नसतील.
‘लेक लाडकी’च्या उद्दिष्टांत वाढ
‘लेक लाडकी’ योजनेसाठी राज्याला सुमारे अडीच लाख लाभार्थ्यांचे उद्दिष्ट देण्यात आले आहे. योजनेसाठी जिल्ह्यांतून आलेल्या अर्जांना मान्यता देऊन रक्कम संबंधित मुलीच्या खात्यावर जमा करावी, तसेच आणखी मुलींचे अर्ज मागवावेत, अशीही सूचना महिला व बाल-कल्याण विभागाचे सचिव अनुपकुमार यांनी केल्याचे सूत्रांनी सांगितले.
