विधान परिषद निवडणूक, तिसरा उमेदवार उतरविणार?
मुंबई : प्रतिनिधी
जुलै महिन्यात ११ जागांसाठी होऊ घातलेली विधान परिषदेची निवडणूक चुरशीची होण्याची शक्यता निर्माण झाली आहे. महाविकास आघाडीकडून तिसरा उमेदवार दिला जाण्याची दाट शक्यता असून सत्ताधा-यांना धक्का देण्याची रणनीती आघाडीतील नेत्यांनी आखल्याचे सूत्रांचे म्हणणे आहे. रिक्त जागांनुसार महायुतीकडे ९ तर महाविकास आघाडी २ जागा निवडून आणू शकते. परंतु मविआकडून तिसरा उमेदवार उतरवून गुप्त मतदानाचा फायदा उचलण्याचा प्रयत्न होणार असल्याचे कळतेृ
विधान परिषदेतून ११ आमदार निवृत्त झाले असून त्यांच्यासाठी निवडणूक कार्यक्रम जाहीर झाला आहे. विधान परिषदेतील आमदार निवडून आणण्यासाठी विधानसभेतील आमदार मतदान करतात. सध्या विधानसभेतील आमदारांची संख्या २७४ असून परिषदेत आमदार निवडून आणण्याचा कोटा २३ इतका आहे. भाजपचे सध्या १०५ आमदार असून अजित पवार यांच्या राष्ट्रवादीकडे ४० आणि एकनाथ शिंदे यांच्या नेतृत्वातील शिवसेनेकडे ३८ आमदार आहेत तर महाविकास आघाडीतील काँग्रेसकडे ३७, शिवसेना ठाकरे गटाकडे १५ तर राष्ट्रवादी काँग्रेस शरदचंद्र पवार पक्षाकडे १० आमदार आहेत.
पक्षीय बलाबलामुळे पाचवी जागा निवडून आणण्यासाठी भाजपची भिस्त अपक्षांवर आहे तर दुसरीकडे प्रत्येक दोन जागा निवडून आणण्यासाठी राष्ट्रवादी आणि शिवसेना यांना मविआमधील आमदार फोडावे लागणार आहेत. दुसरीकडे महाविकास आघाडीची ताकद दोन जागांवर उमेदवार निवडून आणायची असली तरीही तिस-या जागेवर उमेदवार देण्याची रणनीती आखण्यात आल्याचे कळते.
आघाडीची जुळवाजुळव
महाविकास आघाडीतील एका ज्येष्ठ नेत्याने मटाशी बोलताना सांगितले की, काँग्रेस एक जागा सहज निवडून आणू शकते तर दुसरी जागा काँग्रेस-राष्ट्रवादी यांच्या पाठिंब्याने निवडून येऊ शकते. परंतु, योग्य रणनीती आखल्यास तिसरी जागाही निवडून आणणे शक्य असून त्यासाठी आघाडीने जुळवाजुळव सुरू केली आहे.
