नागपूर : प्रतिनिधी
पंतप्रधान नरेंद्र मोदी यांनी नागपूर येथे स्मृती मंदिर आणि दीक्षाभूमीस भेट दिली व डॉ. बाबासाहेब आंबेडकरांना अभिवादन केले. त्यांच्या हस्ते माधव नेत्रालयाच्या इमारतीचे भूमिपूजन करण्यात आले. मुख्यमंत्री देवेंद्र फडणवीस यांनी नेत्रालयाच्या सेवाकार्याचे महत्व सांगत माधव नेत्रालय केवळ नागपूर आणि महाराष्ट्रासाठी नाही तर पूर्ण मध्य भारतासाठी एक महत्वपूर्ण संस्था होणार असल्याचे सांगितले .
दरम्यान, देशाचे पंतप्रधान नरेंद्र मोदी हे नागपूर दौ-यावर आहेत. रेशीमबागेतील स्मृती मंदिर, दीक्षाभूमी याठिकाणी मोदींनी भेट दिली. डॉ. बाबासाहेब आंबेडकरांना अभिवादन केले. नरेंद्र मोदींच्या हस्ते माधव नेत्रालयाच्या इमारतीचे भूमिपूजन करण्यात आले. राज्याचे मुख्यमंत्री देवेंद्र फडणवीस, केंद्रीय मंत्री नितीन गडकरी, मोहन भागवत आदी यावेळी उपस्थित होते. नागपूर हिंसाचारानंतर नरेंद्र मोदी हे पहिल्यांदाच नागपूर दौ-यावर आहेत. गुढीपाडव्याच्या दिवशी नरेंद्र मोदी नागपूरात आहेत.
माधव नेत्रालयाच्या इमारतीचे भूमिपूजनवेळी मुख्यमंत्री देवेंद्र फडणवीस यांनी मोठे भाष्य केले आहे. देवेंद्र फडणवीस म्हणाले की, आपल्या सर्वांसाठी ही आनंदाची गोष्ट आहे की, आज माधव नेत्रालयाचे भूमिपूजन होत आहे. मागील काही वर्षांपासून माधव नेत्रपेढी काम करत आहे. अनेक लोकांच्या जीवनात प्रकाश आणण्याचे काम माधव नेत्रपेढीने केले आहे. आपल्या सर्वांना माहिती आहे की, दृष्टी ही देवाने दिलेली सर्वात मोठी गोष्ट आहे.
पुढे फडणवीस म्हणाले, ज्यांना दृष्टी नाही त्यांना दृष्टी देणे, यापेक्षा कोणतीही मोठी सेवा नाहीये. आमच्या स्वयंसेवकांनी गेल्या ३० वर्षात निरंतर ही सेवा सुरू ठेवलेली आहे. आपल्या सर्वांनाच माहिती आहे की, देशामध्ये मोठ्या प्रमाणात नेत्रसेवाची आवश्यकता आहे. विशेष: आता मोठ्या प्रमाणात नेत्रदान होत आहे. लोक फक्त संकल्प घेत नाही तर नेत्रदान देखील करत आहेत. यामुळे हे अत्यंत महत्वाचे आहे.
माधव नेत्रालय केवळ नागपूर आणि महाराष्ट्रासाठी नाही तर पूर्ण मध्य भारतासाठी एक महत्वपूर्ण संस्था होणार आहे. यामुळे अनेक लोकांना दृष्टीदोषपासून मुक्ती मिळेल आणि अनेकांना दृष्टी मिळेल. काही लोकांना देवाने दिलेला हा जो आर्शिवाद आहे तो मिळेल. मी माधव नेत्रालयाच्या सर्व संचालकांना खूप शुभच्छा देतो. कारण देवाचे काम त्यांनी हातात घेतले आहे. संघाचे जवळपास दीड लाख सेवाप्रकल्प असल्याचेही देवेंद्र फडणवीस यांनी म्हटले आहे. माधव नेत्रालयाच्या भूमिपूजनावेळी लोक हे मोठ्या संख्येने उपस्थित होते.
