न्यूयॉर्क : अयोध्येतील श्रीराम मंदिरातील प्राणप्रतिष्ठा सोहळ्याचा भारतीयांमध्ये प्रचंड उत्साह पाहायला मिळत आहे. २२ जानेवारीला अयोध्येत होणा-या कार्यक्रमाची जय्यत तयारी सुरू आहे. दरम्यान, विदेशातही जोरदार तयारी सुरू असल्याचे दिसत आहे. अमेरिकेत २२ जानेवारीला अयोध्येतील राम मंदिरात प्राण प्रतिष्ठा सोहळ्यापूर्वी श्रीराम आणि भव्य मंदिराचे मोठे होर्डिंग्ज लावण्यात आले आहेत.
युनायटेड स्टेट्समधील हजारो मैलांच्या अंतरावरील १० पेक्षा जास्त राज्यांमध्ये होर्डिंग्ज लावण्यात आले आहेत. विश्व हिंदू परिषद, यूएस चॅप्टरने, संपूर्ण अमेरिकेतील हिंदूंच्या सहकार्याने, १० राज्यांमध्ये ४० हून अधिक होर्डिंग्ज लावले आहेत आणि श्रीराम मंदिराच्या प्राण प्रतिष्ठा सोहळ्याचे संदेश प्रदर्शित केले आहेत.
टेक्सास, इलिनॉय, न्यूयॉर्क, न्यू जर्सी आणि जॉर्जियासह इतर राज्यांमध्ये बिलबोर्ड लावले आहेत. या व्यतिरिक्त, विश्व हिंदू परिषद, यूएस शाखेनुसार, अ‍ॅरिझोना आणि मिसूरी राज्ये सोमवार, १५ जानेवारीपासून व्हिज्युअल एक्स्ट्राव्हॅगांझामध्ये सामील होणार आहेत.
