मुंबई : बॉलिवूडमध्ये स्वत:ची वेगळी ओळख निर्माण करणारे अभिनेता आणि भाजप नेता मिथुन चक्रवर्ती यांचा मुलगा नमोशी देखील मनोरंजनाच्या दुनियेत सक्रिय झाला आहे. अनेक चित्रपटांमध्ये काम केल्यानंतर नमोशीने आता चित्रपटनिर्मितीच्या दुनियेत पाऊल टाकले असून, त्याने स्वत:चे प्रोडक्शन हाऊस सुरू केले आहे. नमोशीने शनिवारी ही माहिती सोशल मीडियावर शेअर केली. यानंतर नमोशीला त्याच्या नव्या वाटचालीबद्दल अभिनेता अमिताभ बच्चनसह चित्रपट क्षेत्रातील लोकांसह चाहत्यांनी शुभेच्छा दिल्या आहेत.
नमोशीने आपल्या प्रोडक्शन हाऊसचे नाव ‘एमवायआरएनडी मूव्हीज’ असे ठेवले आहे. त्याने शनिवारी त्याच्या अधिकृत इन्स्टाग्राम अकाऊंटवरून एक पोस्ट शेअर केली. याची घोषणा केली. यासोबतच नामोशीने आपल्या प्रोडक्शन हाऊसच्या लोगोची झलक दाखवली. त्याचे स्लोगन आहे, आम्ही प्रत्येकाच्या कथांवर विश्वास ठेवतो, नमोशीच्या या पोस्टनंतर त्याच्या नव्या वाटचालीसाठी चाहत्यांकडून आणि मनोरंजन क्षेत्रातील कलाकारांकडून मोठ्या प्रमाणात शुभेच्छा देण्यात येत आहेत.
बिग बींनी दिल्या शुभेच्छा
नमोशीने शनिवारी आपल्या प्रोडक्शन हाऊसची माहिती दिल्यानंतर अभिनेता अमिताभ बच्चन यांनी रविवारी त्यांच्या अधिकृत इन्स्टाग्राम अकाऊंटवरून एक पोस्ट शेअर करून नमोशीचे अभिनंदन केले. बिग बींनी आपल्या पोस्टमध्ये लिहिले की नव्या सुरुवातीसाठी मिथुन दा यांना शुभेच्छा. यासोबत बिग बींनी नमोशीलाही त्यांच्या पोस्टमध्ये टॅग केले आहे.
