शाजापूर : सध्या मध्य प्रदेशात राहुल गांधी यांची भारत जोडो न्याय यात्रा सुरू आहे. मंगळवारी ही यात्रा शाजापूरला पोहोचली. तेथे एक वेगळे दृश्य पाहायला मिळाले. भारत जोडो न्याय यात्रा या जिल्ह्यातून जात असताना राहुल गांधींसमोर मोदी-मोदी अशा घोषणा दिल्या जाऊ लागल्या. भाजपाशी संबंधित लोकांनी या घोषणा दिल्या. या लोकांनी केवळ घोषणाबाजीच केली नाही तर राहुल गांधींना बटाटेही भेट म्हणून दिले.
राहुल गांधी यांनी घोषणाबाजी करणा-या भाजप कार्यकर्त्यांची भेट घेतली आणि त्यांचे आभार मानले. शाजापूरमध्ये राहुल गांधी म्हणाले की पूर्वी देशातील तरुण जेव्हा सैन्यात भरती व्हायचे तेव्हा लष्कर त्यांच्या संरक्षणाची हमी देत असे. सैनिक शहीद झाला तर त्याला शहीद दर्जा मिळतो. आता मोदी सरकारने अग्निवीरला सैन्यात आणल्याने सैनिकांमध्ये भेदभाव निर्माण झाला आहे. कोरोनाच्या वेळी देशातील दीड लाख तरुणांची सैन्यात निवड झाली, मात्र तीन वर्षांनंतरही ते रुजू झालेले नाहीत. आता त्यांचे सर्व मार्ग बंद झाले आहेत. अखेर या दीड लाख तरुणांची चूक काय होती? असा सवाल देखील विचारला आहे. शेतक-यांबाबत बोलताना राहुल गांधी म्हणाले की, आमचे सरकार सत्तेवर येताच आम्ही शेतक-यांना एमएसपीची हमी देऊ. मध्य प्रदेशात राहुल गांधी म्हणाले आहेत की, देशात ओबीसी, दलित, आदिवासी आणि अल्पसंख्याक वर्गातील सुमारे ९०% लोक आहेत.
परीक्षेचा पेपर फुटतोच कसा?
देशातील मोठमोठ्या कंपन्यांच्या व्यवस्थापनात तुम्हाला ओबीसी, दलित किंवा आदिवासी समाजातील एकही व्यक्ती सापडणार नाही. हा सामाजिक अन्याय आहे, जो देशातील जवळपास प्रत्येक संस्थेत होत आहे. गरिबांची मुले अनेक वर्षे मेहनतीने अभ्यास करतात. पण पेपर देण्यासाठी परीक्षा केंद्रावर जाताच तिथल्या श्रीमंतांच्या मुलांच्या मोबाईलमध्ये आधीच पेपर असतो. परीक्षेचा पेपर फुटतो. म्हणजे आज गरिबांच्या मुलांसाठी सर्व मार्ग बंद झाले आहेत.
