कोलकाता : पश्चिम बंगालमध्ये मोठा रेल्वे अपघात झाल्याचे वृत्त आहे. सियालदहहून आगरतळाला जाणारी कांचनजंगा एक्स्प्रेस सिलीगुडीमध्ये मालगाडीला धडकली.या दुर्घटनेतील आतापर्यंत ५ जणांचे मृतदेह बाहेर काढण्यात आले आहेत. तर २५ ते ३० जण जखमी झाले आहेत. दरम्यान, मृतंच्या संख्येत वाढ होण्याची शक्यता आहे. सुमारे ३ बोगी रुळावरून घसरून इंजिनवर चढल्या आहेत.रेल्वे प्रशासनाव्यतिरिक्त स्थानिक पोलीस आणि निमलष्करी दल मदत आणि बचाव कार्यात गुंतले आहेत. राष्ट्रपती द्रौपदी मुर्मू, पंतप्रधान नरेंद्र मोदी यांनी या घटनेबद्दल दु:ख व्यक्त केले आहे.
दरम्यान, दार्जिलिंगचे अतिरिक्त पोलिस अधीक्षक अभिषेक रॉय यांनी सांगितले की, आतापर्यंत २५ ते ३० जण जखमी झाले आहेत. त्याला रुग्णालयात दाखल करण्यात आले आहे.त्याने सांगितले की मालगाडीने कांचनजंगा एक्सप्रेसला मागून धडक दिली. घटनेच्या वेळी दार्जिलिंगमधील रंगपानी आणि निजबारी स्थानकांदरम्यान कांचनजंगा एक्सप्रेस उभी होती.अपघातांच्या कारणांची माहिती समोर आलेली नाही. रेल्वे प्रशासनाने या प्रकरणाची चौकशी सुरू केली आहे. असे आशुतोत रॉय यांनी सांगितले. दरम्यान, अपघाताची माहिती देताना पश्चिम बंगालच्या मुख्यमंत्री ममता बॅनर्जी यांनी सोशल मीडियावर दुर्घटनेवर दु:ख व्यक्त करत डॉक्टरांची एक टीम घटनास्थळी रवाना झाली असल्याचे सांगितले.
बातमी अत्यंत दु:खदायक : राष्ट्रपती मुर्मू
राष्ट्रपती द्रौपदी मुर्मू यांनी आपल्या पोस्टमध्ये म्हटलं आहे की, ‘पश्चिम बंगालमधील दार्जिंिलग येथे झालेल्या रेल्वे अपघातात जीवितहानी झाल्याची बातमी अत्यंत दु:खदायक आहे. माझ्या प्रार्थना पीडितांच्या कुटुंबियांसोबत आहेत. मी जखमींच्या लवकरात लवकर बरे होण्यासाठी आणि बचाव कार्य यशस्वी होण्यासाठी प्रार्थना करते. ’
रेल्वे अपघात दु:खद : पंतप्रधान मोदी
या दुर्घटनेवर शोक व्यक्त करताना पीएम मोदी यांनी आपल्या पोस्टमध्ये म्हटले आहे की, ‘पश्चिम बंगालमधील रेल्वे अपघात दु:खद आहे. या अपघातात ज्यांनी आपल्या प्रियजनांना गमावले आहे त्यांच्याबद्दल शोक व्यक्त करतो. जखमी लोक लवकरात लवकर बरे व्हावेत अशी मी प्रार्थना करतो.’
रेल्वेमंत्र्यांनी केला शोक व्यक्त
रेल्वे अपघाताबद्दल शोक व्यक्त करताना रेल्वेमंत्री अश्विनी वैष्णव यांनी ट्विटरवर लिहिले की, एनएफआर झोनमध्ये दुदैर्वी अपघात झाला असून, बचावकार्य युद्धपातळीवर सुरू आहे. रेल्वे, एनडीआरएफ आणि एसडीआरएफ एकत्र काम करत आहेत, अशी माहिती रेल्वे मंत्र्यांनी दिली आहे. वरिष्ठ अधिकारी घटनास्थळी दाखल झाले आहेत. दरम्यान रेल्वेमंत्री देखील तातडीने पश्चिम बंगालला रवाना झाले आहेत.
