नवी दिल्ली : केंद्राची मोफत धान्य योजना ५ वर्षांसाठी वाढवण्यात आली आहे. या योजनेचा सुमारे ८१ कोटी लोकांना फायदा होणार आहे. केंद्रीय मंत्री अनुराग ठाकूर यांनी बुधवारी मंत्रिमंडळाच्या पत्रकार परिषदेत ही माहिती दिली. ते म्हणाले की, मोफत धान्य योजनेला पाच वर्षांसाठी मुदतवाढ देण्याचा निर्णय घेण्यात आला आहे. सुमारे ८१ कोटी लोकांना याचा लाभ मिळणार आहे. त्याचबरोबर या कामासाठी सुमारे ११.८० लाख कोटी रुपये खर्च करण्यात येणार आहेत.
केंद्रीय मंत्रिमंडळाने १५ हजार महिला स्वयं-सहायता गटांना दोन वर्षांसाठी ड्रोन पुरविण्याच्या केंद्रीय योजनेला मंजुरी दिली आहे. या प्रकल्पाचा खर्च १,२६१ कोटी रुपये असेल. पंतप्रधान नरेंद्र मोदी यांच्या अध्यक्षतेखाली मंगळवारी झालेल्या मंत्रिमंडळाच्या बैठकीत यासंदर्भातील निर्णय घेण्यात आल्याची माहिती माहिती आणि प्रसारण मंत्री अनुराग ठाकूर यांनी बुधवारी पत्रकारांना दिली.
ठाकूर म्हणाले की, २०२४-२५ ते २०२५-२०२६ या कालावधीत शेतकर्‍यांना कृषी उद्देशांसाठी सेवा देण्यासाठी १५ हजार निवडक महिला बचत गटांना ड्रोन पुरवणे हे या योजनेचे उद्दिष्ट आहे. योजनेच्या अधिकृत प्रकाशनानुसार या उपक्रमाला मंजुरी देण्यात आली. हे १५ हजार बचत गटांना शाश्वत व्यवसाय आणि उपजीविका आधार प्रदान करणार आहे. याद्वारे ते वर्षाला किमान १ लाख रुपये अतिरिक्त उत्पन्न मिळवू शकतील.
