माळशिरस : राहत्या घराच्या जागेच्या वादातून फोंडशिरस (ता. माळशिरस) येथे झालेल्या खून प्रकरणातील तीन आरोपींना माळशिरस जिल्हा व अतिरिक्त सत्र न्यायालयाचे न्यायाधीश एल. डी. हुली यांनी जन्मठेप व प्रत्येकी पाच हजार रुपये दंडाची शिक्षा सुनावली. जन्मठेपेची शिक्षा झालेले तीन सख्खे भाऊ आहेत.
किसन महादेव वाघमोडे(२२), धर्मेंद्र महादेव वाघमोडे(२८) व अंकुश महादेव वाघमोडे (वय ३५, सर्व रा. फोंडशिरस, ता. माळशिरस) अशी शिक्षा झालेल्या तीन सख्ख्या भावांची नावे आहेत. याबाबतची फिर्याद मयताचा मुलगा बापू वाघमोडे यांनी नातेपुते पोलिस ठाण्यात दिली होती. फिर्यादी व आरोपी हे एकमेकांच्या शेजारी गट नं १४१३ राहण्यास आहेत. त्यांच्यामध्ये जमिनीचा वाद होता. फिर्यादीचे घर हे आरोपींच्या शेतात येत असल्याने व फिर्यादीची जनावरे आरोपी आमच्या जागेत बांधायची नाहीत, असे सांगत असल्याने फिर्यादी व आरोपी यांच्यात नेहमी वाद होत होता.
१९ ऑक्टोबर २०२१ रोजी सायंकाळी साडेचार वाजता फिर्यादी व आरोपी यांच्यात घर व जनावरे बांधण्याच्या कारणावरून वाद झाला. या वादाच्या वेळी आरोपी किसन वाघमोडे यांनी लोखंडी पाइपने फिर्यादीचे वडील नाना अण्णा वाघमोडे(७०) यांच्या डोक्यात मारहाण केली. तर धर्मेंद्र वाघमोडे व अंकुश वाघमोडे यांनी लाथाबुक्क्यांनी मारहाण केली. डोक्यात जबरी मार बसल्याने नाना वाघमोडे यांच्या तोंडातून व डोक्यातून रक्त येऊन ते बेशुद्ध पडले. त्यांना नातेपुते येथील रुग्णालयात उपचारासाठी नेले व तेथून अकलूज येथे दाखल केले असता ते मयत झाल्याचे डॉक्टरांनी सांगितले.
याबाबत मयताचा मुलगा बापू वाघमोडे यांनी तीन आरोपींच्या विरोधात नातेपुते पोलिस ठाण्यात फिर्याद दाखल केली होती. या घटनेचा तपास नातेपुते पोलिस स्टेशनचे सहाय्यक पोलिस निरीक्षक मनोज सोनवलकर यांनी केला. तपास करून वरील तीन आरोपींच्या विरोधात जिल्हा व सत्र न्यायालयात दोषारोप पत्र दाखल केले. या खटल्यात इतर साक्षीदार तपासण्यात आले आहेत. यात मयताच्या नातवाची साक्ष महत्त्वाची ठरली. पोलिसांनी दाखल केलेले पुरावे व सरकारी वकिलांनी केलेला युक्तिवाद ग्रा धरून जिल्हा व सत्र न्यायाधीश एल. डी. हुली यांनी किरण वाघमोडे, धर्मेंद्र वाघमोडे व अंकुश वाघमोडे या तिघांना जन्मठेप व पाच हजार रुपये दंडाची शिक्षा सुनावली. या खटल्यात सरकारी पक्षातर्फे अॅड. संग्राम पाटील व अॅड. सूर्यकांत ढवळे यांनी काम पाहले.
