मुंबई : प्रतिनिधी
भाजपाने राज्यात अजून एक मोठी कामगिरी बजावली आहे. भाजपाची विधानसभेत महा लाट आली. तशीच सदस्य नोंदणीत त्सुनामी आली आहे. भाजपची राज्यात १ कोटींहून अधिक सदस्य नोंदणी झाली आहे.
भाजपाची राज्यात मोठी लाट आली आहे. विधानसभा निवडणुकीत भाजपाने मोठी मुसंडी मारली. आतापर्यंतचे सर्व रेकॉर्ड मोडीत काढले. महायुतीत भाजपा हा मोठा भाऊ असल्याचे सिद्ध केले. तर आता सदस्य नोंदणीतही भाजपाने नवीन विक्रम केला आहे. भाजपची राज्यात १ कोटींहून अधिक सदस्य नोंदणी झाली आहे. स्थानिक स्वराज्य संस्था निवडणुकीपूर्वीच भाजपाने मोठी मोर्चेबांधणी केल्याचे दिसून आले.
महाराष्ट्र भाजपने निष्ठावंत कार्यकर्त्यांच्या बळावर आणि महाराष्ट्राच्या जनतेच्या आशीर्वादाने १ कोटी सदस्य नोंदणी पूर्ण केली आहे. १ कोटी हा केवळ आकडा नसून महाराष्ट्राच्या जनतेचा भाजपावरील विश्वास आहे, अशी प्रतिक्रिया मुख्यमंत्री देवेंद्र फडणवीस यांनी दिली. त्यांनी नोंदणी अभियान यशस्वी केल्याबद्दल पदाधिका-यांचे अभिनंदन केले.
आता लवकरच दीड कोटीचा टप्पा
पंतप्रधान नरेंद्र मोदी यांची प्राथमिक सदस्यता नोंदणी करत सदस्यता अभियान सुरू केले होते. राज्यात देवेंद्र फडणवीस यांची प्राथमिक सदस्यता नोंदणी करत अभियानाला सुरुवात झाली आहे. भाजपने दीड कोटी सदस्य संख्या असलेली पार्टीचा संकल्प केला होता. एक कोटी सदस्यांचा आमचा प्रवास आता पूर्ण झाला. राज्यातले मुख्यमंत्री, मंत्री, सर्वांनी भार घेतला. पुढील काही दिवसांत १५ लक्ष सदस्य होतील, असे प्रदेशाध्यक्ष चंद्रशेखर बावनकुळे म्हणाले.
संघटन पर्व राबविणार : बावनकुळे
पक्ष संघटना, कार्यकर्ते आम्ही काम करत आहोत. पुढील १५ दिवस आम्ही संघटन पर्व राबविणार आहोत. जवळपास १ लाख बूथवर आम्ही १ कोटी २ लाख सदस्य बनवले आहेत. मला अभिमान आहे, १८५६ कार्यकर्त्यांनी १ हजार सदस्य संख्या पूर्ण केली. १७२६ कार्यकर्त्यांनी ५०० सदस्य संख्या केली. या अभियानात युवा, लाडक्या बहिणी, आदिवासी भागात, बौध्द समाजात सर्वच समाजाने सहयोग घेतला आहे. असा कोणताही समाज नाही ज्याने भाजपची सदस्यता घेतली नाही. मोठ्या प्रमाणात मुस्लिम समाजातील लोकांनी सहभाग घेतला आहे, अशी माहिती प्रदेशाध्यक्ष चंद्रशेखर बावनकुळे यांनी यावेळी दिली.
