नवी दिल्ली : वृत्तसंस्था
आई-बाबा मला माफ करा…,अशी नोट लिहून यूपीएससी करणा-या महाराष्ट्रातील विद्यार्थिनीची दिल्लीत आत्महत्या केली. आत्महत्या करण्यापूर्वी नोटमध्ये तिने अनेक धक्कादायक बाबींवर प्रकाश टाकला आहे. परीक्षेचा अभ्यास करताना येणारा मानसिक तणाव, शिकवणी वर्ग, घरमालक, वसतिगृह संचालक आणि यासाठी कार्यरत असलेल्या दलालांकडून होणा-या आर्थिक निवडणुकीवर प्रकाश टाकला.
दरम्यान, महाराष्ट्रातील पूजा खेडकर प्रकरण, दिल्लीतील कोचिंग सेंटरमध्ये साचलेल्या पावसात तीन विद्यार्थ्यांचा झालेला मृत्यू आणि एका विद्यार्थ्याचा विजेच्या धक्क्याने झालेला मृत्यू या कारणांमुळे गेल्या काही दिवसांपासून केंद्रीय नागरी लोकसेवा परीक्षेबाबत चर्चा सुरू आहे. अशातच आता अकोल्यातील एका यूपीएससीच्या विद्यार्थिनीने दिल्लीत आत्महत्या केल्याची धक्कादायक घटना समोर आली. महाराष्ट्रातील अंजली ही विद्यार्थिनी दिल्लीतील जुन्या राजेंद्रनगरमध्ये भाड्याच्या खोलीत राहून यूपीएससीची तयारी करत होती. मात्र २१ जुलै रोजी तिने आत्महत्येपूर्वी एक नोट लिहून टोकाचे पाऊल उचलले.
यूपीएससीची तयारी करणा-या अंजलीने नैराश्यातून आत्महत्या केली असून, सिव्हिल सर्व्हिसेस परीक्षेला सामोरे जाणा-या उमेदवारांना कोणत्या दबावाला सामोरे जावे लागते, हे सुसाईड नोटमध्ये सांगितले आहे. तिने आत्महत्येपूर्वी सुसाईड नोटमध्ये दैनंदिन समस्याही नोंद केल्या आहेत. पीजी आणि वसतिगृहे विद्यार्थ्यांचे पैसे लुटत असल्याचे तिने लिहिले आहे. दिल्लीत राहून प्रत्येक उमेदवाराला कोचिंग परवडत नाही.
‘आई-बाबा मला माफ करा. मी आता आयुष्याला कंटाळले आहे. माझ्यासमोर फक्त समस्या आणि समस्याच आहेत. मला आता शांततेची गरज आहे. या नैराश्यातून मुक्त होण्यासाठी मी खूप प्रयत्न केले. पण मी नैराश्यातून मुक्त होऊ शकले नाही. त्यावर मात करू शकले नाही’, असे अंजलीने तिच्या सुसाईड नोटमध्ये लिहिले आहे.
पहिल्याच प्रयत्नात यूपीएससी परीक्षा उत्तीर्ण होण्याचे माझे स्वप्न होते. पण मी किती चंचल आहे हे सर्वांना माहीत आहे. कृपया सरकारी परीक्षांमधील घोटाळे कमी करा आणि रोजगार निर्माण करा. अनेक तरुण नोकरीसाठी धडपडत आहेत, असे तिने पत्रात पुढे म्हटले आहे. अंजलीच्या सुसाईड नोटमध्ये पाहुण्यांच्या सुविधा आणि वसतिगृहाच्या मोठ्या खर्चाचा उल्लेख आहे.
मृत्यूपूर्वी तिने श्वेता नावाच्या मैत्रिणीशी पीजीच्या वाढत्या भाड्याबाबत चर्चा केली होती. पीजी आणि वसतिगृहाचे भाडे कमी करणे आवश्यक आहे. हे लोक केवळ विद्यार्थ्यांकडून पैसे लुटत आहेत. प्रत्येक विद्यार्थ्याला त्रास होणार नाही, असे त्यांनी पत्रात म्हटले आहे.
