मुंबई : प्रतिनिधी
भाजपचे खायचे आणि दाखवायचे दात वेगळे आहेत. वक्फच्या सुधारीत विधेयकाच्या नावाखाली वक्फ बोर्डाच्या जमिनी आपल्या मित्राच्या घशात घालण्याचा भाजपचा डाव असल्याचा आरोप शिवसेना (ठाकरे) पक्षप्रमुख उद्धव ठाकरे यांनी आज केला. शिवसेनेचा विरोध हा विधेयकाला नव्हे तर सत्ताधारी भाजपच्या ढोंगीपणाला आणि त्यांच्या भ्रष्टाचाराला आहे असे स्पष्ट करतानाच हे विधेयक मुस्लिम हिताचे असल्याचा भाजपचा दावा असेल तर त्यांनी हिंदुत्व सोडले आहे का? असा सवालही ठाकरे यांनी केला.
वक्फ सुधारणा विधेयक बुधवारी लोकसभेत मंजूर करण्यात आले. शिवसेना ठाकरे गटाने विधेयकाच्या विरोधात मतदान केल्यामुळे भाजप आणि शिवसेना शिंदे गटाने टीकेची झोड उठवली आहे. या पार्श्वभूमीवर उद्धव ठाकरे यांनी आज मातोश्रीवर पत्रकार परिषद घेऊन पक्षाची भूमिका स्पष्ट केली. या विधेयकात वक्फ बोर्डातल्या काही सुधारणा चांगल्या आहेत, त्याच्याबद्दल काही वाद नाही. पण भाजपचे खरे रुप या विधेयकामुळे देशाला कळले आहे.
हिंदुत्वाबाबत भाजपाची धरसोड वृत्ती ही आता हिंदुनाही कळलेली आहे. हे विधेयक नेमके मुस्लिमांच्या बाजूने आहे की विरोधात हे भाजपने स्पष्ट करावे, असे आव्हान ठाकरेंनी दिले. भाजपचे सगळे नेते मुस्लिमांचे गुणगान गात आहेत. मुस्लिमांच्या हिताचे बिल आणले म्हणता, मग गरीब हिंदुसाठी तुम्ही काय करणार? मग हिंदुत्व कोणी सोडले ? असे सवाल करत भाजपचा मुस्लिम धार्जिणा चेहरा समोर आल्याचा हल्लाबोल ठाकरेंनी केला. गृहमंत्री अमित शाह आणि त्यांच्या मित्रपक्षांनी संसदेत मुस्लिम समाजाबद्दल कळवळा आणणारी केलेली भाषणे जिनांनाही लाजवणारी होती अशी टीका उद्धव ठाकरे यांनी केली.
राज्यातील देवस्थानच्या जमिनी आधीच हडपल्या गेल्या आहेत. कुठल्या धर्माच्या धार्मिक जमिनीत गैर धर्माची व्यक्ती आणून बसवली तर त्या धर्मातील लोकांना वाईट वाटण स्वाभाविक आहे. मंत्री किरण रिजीजू यांनी वक्फने संसदेच्या जमिनीवर दावा केला अशी खोटी माहिती दिली. वक्फ बोर्डाच्या जमिनीवरच सत्ताधा-यांचा डोळा आहे. फटाक्याची वात पेटवायची आणि पळून जायचे. फुटून सगळे झाले की मग मिरवायला यायचे. पण वाट लागली त्याची जबाबदारी कोण घेणार? असा सवाल करत भाजपचा हिंदुत्वाचा ढोंगीपणा समोर आला असून त्यामुळे भाजपाने झेंड्यावरील हिरवा रंग काढून दाखवावा असे आव्हान ठाकरेंनी दिले.
वक्फ विधेयक आणि हिंदुत्व याचा काहीही संबंध नाही. पण आम्ही हिंदुत्व सोडल्याचे गद्दारांचे म्हणणे आहे. मग काल तुमच्या आजूबाजूला जी मुसलमानांची तारीफ चालली होती तेव्हा तुमच्या गप्प का होता? आम्ही बाळासाहेबांचे विचार मानणारे आहोत असे उद्धव ठाकरे म्हणाले.
