लातूर : प्रतिनिधी
लातूरमधून मोठी बातमी समोर आली आहे. उदगीर तालुक्यातील एकुर्काजवळ कारचा भीषण अपघात झाला आहे. या अपघातात ४ महिला जागीच ठार झाल्या आहेत. तर तीन जण जखमी झाले आहेत. जखमींना तातडीने शासकीय रुग्णालयात उपचारासाठी दाखल करण्यात आले आहे.
मिळालेल्या माहितीनुसार, उदगीर तालुक्यातील एकुर्काजवळ आज गुरुवारी दुपारी २ डिझायर कारनी या महिला उदगीरहून एकुर्काकडे जात होत्या. एकुरका गावाजवळ पोहोचले असताना भरधाव आयशर टेम्पोला धडकली. हा अपघात इतका भीषण होता की, यात कारचा चुराडा झाला. अपघातात चार महिला जागीच ठार झाल्या.
या अपघातात मंगलबाई गोविंद जाधव (वय ५५ वर्षे, राहणार एकुर्का), प्रतिभा संजय भंडे (वय ३०, राहणार दावणगाव), प्रणिता पांडुरंग बिरादार (वय २५, राहणार होणाळी) अनन्या रणजित भंडे (वय १४ वर्षे, राहणार दावणगाव) यांचा अपघातात जागीच मृत्यू झाला आहे. अन्य तिघा जखमींवर उपचार सुरू आहेत. सर्व मृतदेह शवविच्छेदन करण्यासाठी उदगीर सामान्य रुग्णालयात दाखल करण्यात आले आहेत. एकाच वेळी चार महिलांचा मृत्यू झाल्यामुळे गावावर शोककळा पसरली आहे. रुग्णालयाच्या परिसरात कुटुंबीयांचा आक्रोश काळीज पिळवटून टाकणारा होता. या प्रकरणाची पोलिसांनी नोंद केली असून अधिक तपास करत आहे.