हैदराबाद : तेलंगणात काँग्रेस सरकार आपली आश्वासने पाळण्याचे प्रयत्न करत आहे. १० वर्षांनंतर प्रथमच भारत राष्ट्र समिती (बीआरएस) सरकारला हटवण्यात काँग्रेसला यश आले आहे. दरम्यान, तेलंगणाचे मुख्यमंत्री रेवंत रेड्डी म्हणाले की, त्यांचे सरकार संपूर्ण राज्यात जातनिहाय जनगणनेची तयारी करत आहे. निवडणुकीपूर्वी काँग्रेस पक्षाने जातनिहाय जनगणना करण्याचे आश्वासन दिले होते. आता सरकार जनगणना करण्याची तयारी करत आहे. राज्याच्या वरिष्ठ अधिकाऱ्यांसोबत झालेल्या बैठकीत, मुख्यमंत्री रेवंत रेड्डी यांनी अल्पसंख्याक, मागासवर्गीय आणि आदिवासी कल्याण विभागांशी संबंधित समस्यांवर बैठक घेऊन जातनिहाय जनगणना करण्याचे निर्देश दिले आहेत.
विशेष म्हणजे याआधीही बिहारमध्ये जात जनगणनेसारखाच प्रयत्न करण्यात आला होता. मुख्यमंत्री नितीश कुमार यांच्या सरकारने विविध गटांची लोकसंख्या शोधण्यासाठी जात सर्वेक्षण केले होते. तसेच शासकीय कल्याणकारी वसतिगृहांसाठी लागणाऱ्या निधीचा अंदाज घेण्याचे निर्देशही अधिकाऱ्यांना देण्यात आले आहेत. अंदाजित खर्चानुसार हा निधी ‘ग्रीन चॅनल’मध्ये प्रसिद्ध केला जाईल. यामुळे सरकारी तिजोरीतून निधी लवकरात लवकर निघण्यास मदत होते. शासकीय निवासी शाळांचा तपशील देण्याच्या सूचनाही मुख्यमंत्र्यांनी दिल्या आहेत. भाड्याच्या इमारतीत सुरू असलेल्या या शाळांचा तपशील देण्याबरोबरच इमारतींच्या बांधकामासाठी जागा निश्चित करण्याच्या सूचनाही अधिकाऱ्यांना देण्यात आल्या आहेत. त्यासाठी लागणाऱ्या रकमेचाही अंदाज घ्यावा लागेल.
