पुणे : पिंपरी चिंचवडमधे गुन्हेगारी पार्श्वभूमी असलेल्या असिफ महंमद इक्बाल शेख उर्फ असिफ दाढीने उपमुख्यमंत्री अजित पवार यांची भेट घेतल्याचे फोटो समोर आल्याने खळबळ उडाली. असिफ दाढीवर अनेक गंभीर गुन्हे नोंद असून, शस्त्रास्त्रांसह त्याला पोलीसांनी त्याला अटकही केली होती. अजित पवारांची त्याने भेट का घेतली याचे कारण मात्र अद्याप समजू शकलेले नाही.
उल्लेखनिय म्हणजे काही दिवसांपूर्वी अजित पवारांचे पुत्र पार्थ पवार यांनी गुंड गजा मारणेची भेट घेतल्याने मोठ्या प्रमाणात टीका झाली होती.
कुख्यात गुंड हेमंत दाभेकर याने मुख्यमंत्र्यांचे सुपुत्र खासदार डॉ. श्रीकांत शिंदे यांची भेट घेतल्याची बातमी समोर येऊन काही तास उलटत नाही, तो आता थेट उपमुख्यमंत्री अजित पवारांची पुण्यातील पिंपरी चिंचवडमधे गुन्हेगारी पार्श्वभूमी असलेल्या असिफ महंमद इक्बाल शेख उर्फ असिफ दाढीने भेट घेतल्याची बातमी समोर येत आहे. असिफ दाढीने गुरुवारी देवगिरी बंगल्यावर जाऊन अजित पवारांची भेट घेतल्याची माहिती समोर आली आहे. असिफ दाढीला राजकारणात येण्याचे वेध लागले असून, त्यासाठी एका कार्यक्रमाचे आमंत्रण देण्यासाठी तो गेला होता. तृतिय पंथियांसाठी काम करणा-या एक संस्थेसाठी तो काम करतो अशीही माहिती समोर येत आहे.
पार्थ पवार-गजा मारणे भेटीला चुकीचे
म्हणणा-या अजित पवारांचाच फोटो समोर
पार्थ पवार आणि गजा मारणे यांच्या भेटीचा फोटो समोर आल्यावर, पार्थ पवार यांनी गुंड गजा मारणेची जी भेट घेतली आहे ते अतिशय चुकीचे असल्याचे अजित पवार म्हणाले होते. पार्थ ज्या घरी गेला होता त्याठिकाणी गजा मारणे आला होता. माझ्या सोबत देखील असाच प्रकार घडला होता, मात्र मी आता या संदर्भात काळजी घेतो आणि पोलीसांना आधीच सांगून ठेवतो असे अजित पवार म्हणाले होते. मात्र, आता पिंपरी चिंचवडमध्ये गुन्हेगारी पार्श्वभूमी असलेल्या असिफ दाढीसोबतचा त्यांचाच फोटो समोर आल्याने यावर अजित पवार काय बोलणार हे पाहणे महत्वाचे असणार आहे.
