मुंबई : ऑलिम्पिकवीर खाशाबा जाधव यांचा जन्मदिन म्हणजेच १५ जानेवारी दरवर्षी ‘राज्याचा क्रीडा दिन’ म्हणून साजरा केला जाणार आहे. या प्रस्तावास शासनाने मान्यता दिली आहे. तसेच, क्रीडा सप्ताह आणि राष्ट्रीय क्रीडा दिन यासाठीच्या सध्याच्या अनुदानामध्ये वाढ करून प्रति जिल्हा २ लाख २५ हजार रुपये देण्याचा शासनाने निर्णय घेतला आहे. यासंदर्भात क्रीडा आणि युवक कल्याण मंत्री संजय बनसोडे यांनी माहिती दिली आहे.
क्रीडा आणि युवक कल्याण मंत्री संजय बनसोडे म्हणाले की, भारताला पहिले वैयक्तिक ऑलिम्पिक पदक मिळवून देणारे महान कुस्तीपटू खाशाबा जाधव यांच्या कार्याचा गौरव वाढवणा-या कामगिरीस सातत्याने उजाळा मिळावा, त्यातून राज्यातील विद्यमान आणि नव्या खेळाडूंनी प्रेरणा घ्यावी, याकरता त्यांचा जन्मदिन १५ जानेवारी राज्याचा ‘क्रीडा दिन’ म्हणून दरवर्षी संपूर्ण राज्यभरात साजरा करण्यात येणार आहे.
राष्ट्रीय क्रीडा दिन आणि क्रीडा सप्ताह साज
रा करण्यासाठी प्रत्येक जिल्ह्यास पूर्वी १० हजार रुपये अनुदान देण्यात येत होते. त्यात वाढ करून प्रत्येक जिल्ह्यास राज्याच्या क्रीडा दिनासाठी ७५ हजार, राष्ट्रीय क्रीडा दिनास ५० हजार तर क्रीडा सप्ताहास १ लाख रुपये, असे एकूण २ लाख २५ हजार सुधारित अनुदान देण्याचा शुक्रवारी (२९ डिसेंबर २०२३) शासन निर्णय काढण्यात आला आहे. ही क्रीडाप्रेमींसाठी अत्यंत आनंदाची बाब असल्याचे मंत्री बनसोडे यांनी सांगितले तसेच, पुणे येथील शिवछत्रपती क्रीडा वितरण समारंभात राज्याचे मुख्यमंत्री एकनाथ शिंदे यांनी खाशाबा जाधव यांचा जन्मदिवस राज्य क्रीडा दिन म्हणून साजरा करण्याची घोषणा केली. तसेच, उपमुख्यमंत्री देवेंद्र फडणवीस, उपमुख्यमंत्री अजित पवार यांनी राज्य क्रीडा दिवस साजरा करण्यात भरीव अनुदान उपलब्ध करून दिले, त्यामुळे यांचे मंत्री बनसोडे यांनी आभार व्यक्त केले आहेत.
राज्य क्रीडा दिनानिमित्त विविध कार्यक्रमांचे आयोजन
क्रीडा आणि युवक सेवा संचालनालय, क्रीडा प्रबोधिनी, क्रीडा संकुले, प्राथमिक, माध्यमिक शाळा, कनिष्ठ-वरिष्ठ महाविद्यालये, शासकीय तसेच खासगी विद्यापीठे, क्रीडा संस्था, मंडळे अकादमी, क्रीडा योजनांचा लाभ घेणा-या संस्थांमध्ये साजरा केला जाणार आहे. यावेळी खाशाबा जाधव यांच्या योगदानावर व्याख्यान, क्रीडा रॅली, मॅरेथॉन, मार्गदर्शन शिबिर, खेळाडूंशी संवाद, क्रीडा पुरस्काराचे वितरण, राष्ट्रीय, आंतरराष्ट्रीय खेळाडूंचा गौरव, क्रीडा उपक्रमांचे आयोजन यामध्ये करण्यात येणार आहे. त्यात क्रीडाप्रेमींनी उत्स्फूर्तपणे सहभागी होण्याचे आवाहन क्रीडामंत्री बनसोडे यांनी केले आहे.
