नवी दिल्ली : भारताने कॅनडाचा गँगस्टर लखबीर सिंग लांडा याला दहशतवादी म्हणून घोषित केले आहे. गृहमंत्रालयाने ३३ वर्षीय गँगस्टर लखबीरला दहशतवाद विरोधी कायदा युएपीए अंतर्गत दहशतवादी घोषित केले आहे. केंद्रीय गृह मंत्रालयाने दिलेल्या माहितीनुसार, तो इतर दहशतवादी कारवायांव्यतिरिक्त, २०२१ मध्ये मोहाली येथील पंजाब पोलिसांच्या गुप्तचर मुख्यालयावर झालेल्या रॉकेट हल्ल्यात सामील होता. १९८९ मध्ये पंजाबच्या तरनतारन जिल्ह्यात जन्मलेला लखबीर सिंग २०१७ मध्ये कॅनडाला पळून गेला होता.
बब्बर खालसा इंटरनॅशनल (बीकेआय) या कुख्यात खलिस्तानी गटाचा सदस्य म्हणून गृहमंत्रालयाने त्याची ओळख पटवली आहे. हरविंदर सिंग उर्फ रिंडा याच्याशी लांडाचे जवळचे संबंध असल्याचे समजते. लांडाने भारतात अनेक मोठे हल्ले केले आहेत. गृह मंत्रालयाच्या म्हणण्यानुसार, लांडा हा केवळ मोहालीतील रॉकेट हल्ल्यासाठी जबाबदार नव्हता तर सीमापार दहशतवादी कारवायांमध्ये गुंतलेल्या विविध मॉड्यूल्सना सुधारित स्फोटक उपकरणे (आयईडी), शस्त्रे, अत्याधुनिक शस्त्रे आणि स्फोटके पुरवण्यातही त्याचा सहभाग होता.
