नवी दिल्ली : पश्चिम बंगालच्या मुख्यमंत्री ममता बॅनर्जी यांनी त्यांचा पक्ष राज्यात एकट्याने निवडणूक लढवणार असल्याचे स्पष्ट केले आहे. दरम्यान, काँग्रेस अध्यक्ष मल्लिकार्जुन खर्गे यांनी पश्चिम बंगालच्या मुख्यमंत्री ममता बॅनर्जी यांना राहुल गांधी यांच्या नेतृत्वाखालील ‘भारत जोडो न्याय यात्रे’मध्ये सहभागी होण्याचे आवाहन केले आहे. त्यांनी याबाबत ममता बॅनर्जींना एक पत्रही लिहले आहे.
खर्गे म्हणाले की, यात्रा सुरळीत पार पाडण्यासाठी आणि प्रवाशांच्या सुरक्षेची काळजी घेण्यासाठी योग्य त्या सूचना द्याव्यात, अशी विनंती करण्यासाठी मी तुम्हाला पत्र लिहित आहे. इंडिया आघाडीत वाद सुरू असतानाच मल्लिकार्जुन खर्गे यांचे हे पत्र समोर आले आहे. मणिपूरपासून सुरू झालेली ही यात्रा महाराष्ट्रात संपणार आहे. त्याचवेळी हा प्रवास पुन्हा एकदा बिहारमार्गे कोलकाता (बंगाल) मध्ये दाखल होईल. नितीश कुमार लवकरच बिहारमध्ये भाजपशी हातमिळवणी करण्याची शक्यता आहे. नितीश कुमार, राष्ट्रीय जनता दलापासून (आरजेडी) वेगळे होण्याच्या आणि अधिकृतपणे भाजपशी युती करण्याच्या प्रक्रियेत आहेत. नितीश कुमार पायउतार होण्याऐवजी, बिहार मंत्रिमंडळात फेरबदल करण्याकडे लक्ष देत आहे.
