मुंबई : सनी शेवटचा ‘गदर २’ चित्रपटात दिसला होता. या चित्रपटानंतर आता सनी देओलबद्दल बातम्या येत आहेत की तो नितीश तिवारी दिग्दर्शित ‘रामायण’ चित्रपटात दिसणार आहे.
या चित्रपटाची घोषणा झाल्यापासून प्रेक्षक त्याच्याशी संबंधित प्रत्येक अपडेट जाणून घेण्यासाठी उत्सुक आहेत. रणबीर कपूर, सई पल्लवी, विजय सेतुपती आणि यश या चित्रपटात असल्याच्या बातम्या आधीच समोर येत आहेत. आता सनी देओलही या चित्रपटाच्या स्टारकास्टमध्ये सामील झाल्याच्या बातम्या समोर येत आहेत.
नितीश तिवारीचा ‘रामायण’ त्याच्या मनोरंजक कास्टिंगमुळे ब-याच काळापासून चर्चेत आहे. या चित्रपटात रणबीर कपूर भगवान रामाची भूमिका साकारत असल्याच्या बातम्या आधीच येत आहेत. त्याचवेळी, आता या चित्रपटात सनी देओल हनुमानाची भूमिका साकारणार असल्याची बातमी आहे.
मीडिया रिपोर्टस्नुसार, ‘भगवान हनुमानाची भूमिका साकारण्याची संधी मिळाल्याने सनी देओल खूप उत्साहित आहे.’ चित्रपटाची स्टारकास्ट फायनल केल्यानंतर मार्च २०२४ मध्ये चित्रपटाचे शूटिंग सुरू होऊ शकते. प्रेक्षक या चित्रपटाची आतुरतेने वाट पाहत आहेत. रणबीर कपूरला रामाच्या भूमिकेत आणि सनीला हनुमानाच्या भूमिकेत पाहण्यासाठी त्यांचे चाहते खूप उत्सुक आहेत.
