मुंबई : प्रतिनिधी
कथित खिचडी घोटाळ्यातील आरोपी शिवसेना ठाकरे गटाचे सूरज चव्हाण यांना जामीन मंजूर झाला आहे. मुंबई उच्च न्यायालयात झालेल्या सुनावणीत एक लाख रुपयांच्या जातमुचलक्यावर सूरज चव्हाण यांना जामीन मंजूर करण्यात आला आहे. सूरज चव्हाण यांना कोविड काळातील खिचडी घोटाळ्यात १७ जानेवारी २०२४ रोजी अटक करण्यात आली होती. भाजप नेते माजी खासदार किरीट सोमय्या यांनी खिचडी घोटाळ्याचे आरोप केले होते, त्यानंतर सूरज चव्हाण यांना अटक झाली होती.
सूरज चव्हाण हे शिवसेना ठाकरे गटाचे नेते आणि आमदार आदित्य ठाकरे यांचे निकटवर्तीय मानले जातात. भाजप नेते किरीट सोमय्या यांच्या आरोपानंतर सूरज चव्हाण यांना ईडीने १७ जानेवारी २०२४ रोजी अटक केली होती. मुंबई पोलिसांच्या आर्थिक गुन्हे शाखेतर्फे खिचडी घोटाळा प्रकरणी एफआयआर नोंदविला होता.
कोविड काळात परप्रांतीय मजुरांसाठी खिचडी वाटप करण्याचा निर्णय घेण्यात आला होता. या खिचडीत माप मारण्यात आल्याचा आरोप किरीट सोमय्या यांनी केला होता. घोटाळ्याप्रकरणी मुंबई महानगरपालिकेच्या अधिका-यांसह अन्य काही जणांना २ कोटी रुपयांहून अधिक रकमेचा मलिदा मिळाल्याचे सांगण्यात आले होते. यातील आरोपींनी स्थलांतरित मजुरांसाठी खिचडी बनवण्याचे कंत्राट बेकायदेशीररीत्या मिळवले. शिवाय, कराराचे उल्लंघन करत दुस-या एजन्सीला उपकंत्राटही दिल्याचा आरोप होता.
किरीट सोमय्यांनी केले होते आरोप
ठाकरे गटाच्या अनेक नेत्यांना, बेनामी कंपन्यांना कंत्राट देण्यात आले. सूरज चव्हाण यांच्या खात्यात दीड कोटींहून अधिक रुपये दिले गेले. ठाकरे गटाचे लोकसभेचे उमेदवार अमोल गजानन कीर्तिकर यांच्या खात्यात पण पैसे गेल्याचा आरोप केला होता. ज्या तक्रारी दाखल झाल्या आहेत, त्या कंपन्यांमधून अमोल कीर्तिकर यांच्या खात्यात एक कोटी ६५ लाख रुपये दिले. याशिवाय संजय राऊत यांचे भागिदार सुजित पाटकर यांचा राजीव साळुंके सह्याद्री बदलीवर आलेल्या सूरज चव्हाण यांच्या खात्यात एका कंपनीमधून एक कोटी वीस लाख रुपये गेले. ते पैसे कशासाठी? असा प्रश्न विचारला होता?
