श्रीनगर : जम्मू-काश्मीरमधील पुंछ जिल्ह्यात दहशतवाद्यांनी गुरुवारी लष्कराच्या ट्रकवर हल्ला केला. एका महिन्यापेक्षा कमी कालावधीत या भागात लष्करावर झालेला हा दुसरा दहशतवादी हल्ला आहे. ज्या भागात हल्ला झाला त्या भागात अतिरिक्त सुरक्षा दल पाठवण्यात आल्याचे वृत्त आहे. घटनास्थळी गोळीबार सुरू असल्याचे अहवालात म्हटले आहे. पूंछमधील सुरनकोट भागातील डेरा की गली, ज्याला डीओजी म्हणूनही ओळखले जाते, येथे लष्कराच्या ट्रकवर हल्ला करण्यात आला.
हा भाग दहशतवाद्यांचा बालेकिल्ला आणि गेल्या काही वर्षांत लष्करावरील मोठ्या हल्ल्यांचे केंद्र बनला आहे. या वर्षी एप्रिल आणि मे महिन्यात राजौरी-पुंछ भागात झालेल्या दुहेरी हल्ल्यात १० जवान शहीद झाले होते. २००३ ते २०२१ या काळात हा परिसर दहशतवादापासून मोठ्या प्रमाणात मुक्त झाला होता, मात्र तेव्हापासून वारंवार चकमकी होऊ लागल्या. गेल्या दोन वर्षांत या भागात दहशतवादविरोधी कारवायांमध्ये ३५ हून अधिक जवान शहीद झाले आहेत.
