पुणे : प्रतिनिधी
पुण्यातून एक धक्कादायक घटना उघडकीस आली आहे. मालकाने नवीन कुत्रा आणल्याने केअरटेकरने जुन्या कुत्र्याला हाकलून देऊन, तसेच त्याच्या डोक्यात लाकडी बांबूने मारहाण करून त्याचा जीव घेतला. दरम्यान त्यानंतर खड्ड्यात टाकून त्याला जाळल्याची घटना घडली आहे. ही घटना ५ ऑक्टोबर रोजी मुंढव्यातील झेड कॉर्नर येथे घडली आहे.
या प्रकरणी मिशन पॉसिबल फाऊंडेशनच्या पद्मिनी पिटर स्टंप (वय-६६) यांनी मुंढवा पोलिस स्टेशनमध्ये फिर्याद दिली आहे. त्यावरून पोलिसांनी केअरटेकर बिरू डोलारे (वय-४०) याच्यावर गुन्हा दाखल केला आहे. पोलिसांनी दिलेल्या माहितीनुसार, बिरू डोलारे याच्याकडे पूर्वी या कुत्र्याचा सांभाळ करण्याचे काम होते.
त्यानंतर त्याच्या मालकाने एक नवीन कुत्रा आणला. तेव्हा केअर टेकर बिरूने जुन्या कुत्र्याला हाकलून दिले. मात्र तरीही हा कुत्रा वारंवार त्याच्याकडे येत असे. त्याने कुत्र्याच्या डोक्यावर लाकडी बांबूने मारहाण करून त्याला गंभीर जखमी केले. त्याचे दोन्ही पाय दोरीने बांधले. आणि त्याला एका खड्ड्यामध्ये नेऊन टाकले. त्याच्या अंगावर प्लास्टिक, कागद, लाकडे तसेच पेट्रोल टाकून त्याला जिवंत जाळण्यात आले.
