मुंबई : प्रतिनिधी
विधानसभा निवडणुकीनंतर शिवसेना नेते रामदास कदम यांनी अजित पवार गटातील राष्ट्रवादी काँग्रेसच्या कार्यकर्त्यांवर गंभीर आरोप केले आहेत. राष्ट्रवादीच्या कार्यकर्त्यांनी योगेश कदम यांच्या विरोधात निवडणुकीत काम केल्याचा गंभीर आरोप कदम यांनी केला आहे. त्यामुळे आता अजित पवार गट यावर काय भाष्य करणार याकडे सर्वांचे लक्ष लागले आहे.
विधानसभेच्या निवडणुका संपल्या असल्या तरी या निवडणुकीत मित्र पक्षांनी काही ठिकाणी घेतलेल्या असहकार्यावरूनची धुसफूस अजूनही सुरूच आहे. आता यात शिंदे गटाचे नेते रामदास कदम यांनी उडी घेतली आहे. अजितदादा गटाच्या राष्ट्रवादीच्या ९० टक्के कार्यकर्त्यांनी निवडणुकीत योगेश कदम यांचे कामच केले नाही, असा गंभीर आरोप रामदास कदम यांनी केला आहे. तसेच याबाबतची लेखी तक्रार देणार असल्याचेही रामदास कदम यांनी म्हटले आहे. त्यामुळे निवडणुकीच्या मुद्यावरून शिंदे आणि अजितदादा गटात आगामी काळात चांगलीच जुंपण्याची शक्यता वर्तवली जात आहे.
शिवसेना नेते रामदास कदम यांनी मीडियाशी संवाद साधताना ही प्रतिक्रिया व्यक्त केली आहे. विधानसभा निवडणुकीवेळी अनेकजणांनी राष्ट्रवादी सोडली आणि उबाठाचे काम केले. राष्ट्रवादीचे खासदार सुनील तटकरे यांचा उजवा हात असलेल्यांच्या गावात योगेश कदमला मते मिळाली नाहीत. याची माहिती मी सुनील तटकरे यांना देणार आहे. पण आमचे तटकरेंसोबत मतभेद नाहीत. आमची नाराजी नाही. योगेश कदमला पाडावे, असे सुनील तटकरेंच्या मनात कधी येणार नाही. कधीच त्यांच्या मनात असे येणार नाही. पण त्यांच्या कार्यकर्त्यांनी मग मंडणगडचा तालुका प्रमुख असो, दापोलीचा तालुका प्रमुख असो यांनी योगेशसाठी काम केले नाही. आज आणखी बोलायचं नाही. पण राष्ट्रवादीच्या ९० टक्के लोकांनी योगेश कदम यांचे काम केले नाही. याबाबत मी लेखी तक्रार तटकरेंकडे करणार आहे. त्यांनी दखल घ्यावी, असे रामदास कदम म्हणाले.
आमचे सख्य कायम
यावेळी रामदास कदम यांनी ठाकरे गटावरही टीका केली. भाजपसोबत आमचे भाऊबंदकीचे संबंध आहेत. या निवडणुकीत भाजपचे काही उमेदवार शिवसेनेतून निवडून आणले आहेत. आम्ही ते काम केले. आमचे काही उमेदवार भाजपमधूनही निवडून आले. असे सख्य देशात कुठे पाहायला मिळत नाही. हे सख्य कुणाला पाहवत नाही. त्यामुळे आमच्यात मतभेद होतात का हे काहीजण पाहत आहेत, अशी टीका त्यांनी केली.
थोडे मन मोठे करा
रामदास कदम यांनी पालकमंत्रिपदावरूनही प्रतिक्रिया दिली आहे. तसेच सुनील तटकरे यांना मन मोठे करण्याचा सल्ला दिला आहे. पालकमंत्रिपदावरून आपसात मतभेद नको. आपण हातात हात घालून काम केले पाहिजे. दादांचे उजवे हात सुनील तटकरे यांनी थोडसे मन मोठे केले पाहिजे. त्यांची मुलगी पाच वर्षे पालकमंत्री होती. ज्या जिल्ह्यात शिवसेनेचे चार-पाच आमदार आहेत, तिथे शिवसेनेला झुकते माप दिले पाहिजे. थोडे मन मोठे केले पाहिजे. भरत गोगावले हे सीनिअर आहेत. त्यांना पालकमंत्रिपद दिले पाहिजे, असे रामदास कदम म्हणाले.
