मुंबई : बळिराजा हा जगाचा पोशिंदा आहे, पण त्याचा अपमान करण्याची एकही संधी भाजपा युती सरकार सोडत नाही. राज्याचे कृषिमंत्री माणिकराव कोकाटेंना सत्तेचा एवढा माज चढला आहे की, ते सातत्याने शेतक-यांचा अपमान करत आहेत. शेतक-यांना भिकारी म्हटल्यानंतर आता या महाशयांनी कर्जमाफीचे काय करता, लग्न-साखरपुडे करता, शेतीत गुंतवता का? असा प्रश्न विचारून पुन्हा एकदा अपमान केला आहे. शेतक-यांचा अपमान करणा-या कोकाटेंना मंत्रिमंडळातून हाकलून द्या, अशी मागणी महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केली.
हर्षवर्धन सपकाळ म्हणाले, सत्तेत आल्यानंतर शेतक-यांची कर्जमाफी करण्याचे आश्वासन महायुतीने दिले होते, ते अद्याप पाळलेले नाही. कर्जमाफीसाठी पैसे नाहीत असे सरकार म्हणते. त्यात कर्जमाफीवरून कृषिमंत्र्यांचा शेतक-यांना प्रश्न म्हणजे ‘चोर तो चोर आणि वरून शिरजोर’ असा प्रकार आहे. शेतक-याला सरकार मदत करते किंवा कर्जमाफी करते म्हणजे काही उपकार करत नाही. तो जनतेचा पैसा आहे, कोकाटेच्या घरचा नाही. सरकारची धोरणे जर शेती व शेतक-याला अनुकूल असती तर शेतकरी सरकारच्या मदतीवर कशाला अवलंबून राहील. पण भाजपा युती सरकार हे शेतकरीविरोधी आहे. कृषिमंत्री माणिकराव कोकाटे यांनी आपल्या अकलेचे तारे तोडले आहेत.
मूठभर उद्योगपतींना १६ लाख कोटींचे कर्ज माफ केले तेव्हा असा प्रश्न विचारण्याची धमक कोकाटे किंवा सरकारने दाखवली नाही. मग शेतक-यांनाच प्रश्न विचारण्याची हिंमत का होते? कोकाटेंनी यापूर्वीही भिकारीसुद्धा एक रुपया घेत नाही. आम्ही शेतक-यांना एक रुपयात विमा देते असे वक्तव्य करून शेतक-यांचा अपमान केला होता. सातत्याने शेतक-यांचा अपमान करण्याचा रोग या महोदयांना जडला आहे. त्यांनी राज्यातील शेतक-यांची माफी मागावी, अशी मागणी केली.
मंत्र्यांनी बोलताना तारतम्य बाळगावे, असा सल्ला मुख्यमंत्री फडणवीस यांनी दिल्याचे वर्तमानपत्रात वाचले पण मंत्री हे मुख्यमंत्र्यांनाही जुमानत नाहीत. वाट्टेल ते बरळतात. फडणवीस सरकारमध्ये एक एक मंत्री नमुना आहे असे आम्ही म्हटले होते. माणिकराव कोकाटे हा त्यातीलच एक नमुना आहे. अशा मंत्र्यांना आवर घालावा. शेतमालाला भाव नाही, हमीभावापेक्षा कमी भाव मिळत आहे, शेतकरी संकटात असून दररोज शेतकरी आत्महत्या करत आहे. त्याची कृषिमंत्री वा भाजपा युती सरकारला लाज वाटत नाही पण उलट शेतक-यांनाच अजब प्रश्न विचारता, हा सत्तेचा माज शेतकरी नक्की उतरवेल हे लक्षात ठेवा, असा इशाराही सपकाळ यांनी दिला.
संवेदना नसलेले सरकार : विजय वडेट्टीवार
कृषिमंत्र्यांची जबाबदारी फार मोठी असते. विदर्भ, मराठवाडा या भागांमध्ये नुकसान झाले आहे. नाशिक भागात कांदे, डाळिंबाचे नुकसान झाले आहे. या सगळ्यात कृषिमंत्री म्हणून शेतक-यांच्या बांधावर जाऊन त्यांना आश्वस्त करणे गरजेचे होते. पण हे सरकार संवेदना नसलेले आहे. या सरकारच्या संवेदना संपल्या आहेत, अशी टीका काँग्रेस नेते विजय वडेट्टीवार यांनी केली.
जनतेच्या पैशांवर लग्न करणा-यांवर कोणी बोलत नाही : सदाभाऊ खोत
आमदार सदाभाऊ खोत यांनी कृषिमंत्री माणिकराव कोकाटे यांना फटकारले आहे. सदाभाऊ खोत म्हणाले, ‘राज्याचे कृषिमंत्री आणि ज्या पद्धतीने आज शेतक-याच्या संबंधांमध्ये उद्गार काढले ते योग्य आहेत असे मला वाटत नाही. परंतु त्यांचा बोलण्याचा हेतू वेगळा असू शकतो. कृषिमंत्री झाल्यानंतर त्यांचं काम पाहिलं तर समाधानकारक आहे, असेही खोत म्हणाले. या राज्यातल्या शेतक-यांना कर्जमुक्ती दिली पाहिजे का? तर निश्चितपणे दिली पाहिजे. याचे कारण शेतक-याचं कर्ज हे सरकारच्या धोरणामुळे झालेले आहे आणि सरकारचे धोरण हे शेतक-याचे मरण ठरलेले आहे आणि म्हणून ख-या अर्थाने शेतकरीविरोधी जे कायदे आहेत ते आपल्याला रद्द करावे लागतील.
