चुकीच्या पद्धतीने जिल्हा बँकेबद्दल बोलणा-या विरोधकांकडे बघू नका; विश्वास ठेवू नका
लातूर : प्रतिनिधी
राज्यात सहकार क्षेत्रातील नावलौकिक असलेली लातूर जिल्हा मध्यवर्ती सहकारी बँक ही लातूर जिल्ह्यातील लाखो शेतकरी, कष्टकरी आणि सामान्य जनतेच्या विश्वासावर उभी राहिलेली एक सहकारी संस्था आहे. बँकेचे सर्व व्यवहार हे सहकार कायद्यानुसार रिझर्व्ह बँकेच्या नियमांनुसार आणि रीतसर शासकीय ऑडिट अंतर्गत पारदर्शकपणे चालतात.
केवळ राजकीय द्वेषातून विरोध करण्याच्या नादात अशा महत्त्वाच्या संस्थेवर आणि तिच्या व्यवहारांवर सरसकट चिखलफेक करणे पूर्णपणे चुकीचे आहे. याच सहकार चळवळीने लातूरच्या ग्रामीण भागातील शेतक-यांना नेहमीच आर्थिक बळ दिले आहे, हा इतिहास आहे. लोकशाहीत मतदार हेच सर्वोच्च असतात आणि कोण खरे आणि कोण खोटे, याचा निकाल ते निवडणुकीच्या माध्यमातून योग्य वेळी लावतात. त्यामुळे सोशल मीडियावरील अशा बिनबुडाच्या आरोपांनी आणि अपप्रचाराने जनतेचा सहकारावरील व देशमुख परिवारावरील विश्वास कदापी कमी होणार नाही.
सहकारातील शेतक-यांचे भगीरथ माजी मंत्री, सहकार महर्षी दिलीपराव देशमुख व राज्याचे सहकार मंत्री बाबासाहेब पाटील व त्यांच्या पावलावर पाऊल ठेऊन चालणारे उद्याच्या सहकाराचे भविष्य लातूर जिल्हा मध्यवर्ती सहकारी बँकेचे चेअरमन धिरज विलासराव देशमुख यांच्या हातातच सहकार कायम सुरक्षित व प्रगती करत राहील, यात शंकाच नाही.
















