कराडचा कारनामा, बारामतीच्या शेतक-यांचीही फसवणूक
पुणे : प्रतिनिधी
बीड जिल्ह्यातील मस्साजोगचे सरपंच संतोष देशमुख यांचे अपहरण करून हत्या करण्यात आली. या प्रकरणाचा सूत्रधार असल्याचा ठपका असलेल्या वाल्मिक कराडचे अनेक काळे कारनामे समोर आले आहेत. त्याने शेतक-यांना पंढरपूरमधील शेतक-यांना ऊस हार्वेस्टिंग करणा-या मशीनसाठी अनुदान मिळवून देण्याच्या नावाखाली फसवणूक केल्याची माहिती समोर आली होती. त्यातच आता बारामती मतदारसंघातील काही शेतक-यांचीही त्याने फसवणूक केल्याचे समोर आले आहे. शेतक-यांना अनुदान मिळवून देण्यासाठी त्याने शेतक-यांकडून प्रत्येकी आठ-आठ लाख रूपये घेतल्याची तक्रार शेतक-यांनी बारामतीच्या खासदार सुप्रिया सुळे यांच्याकडे केली आहे.
परळीतील वाल्मिक कराडने ऊसतोडणी यंत्र (हार्वेस्टर) अनुदानाच्या आमिषाने फसवणूक केलेल्या बारामतीतील शेतक-यांनी खासदार सुप्रिया सुळे यांची भेट घेऊन त्यांना सर्व घटना सांगितली. हार्वेस्टर घेतलेल्या शेतक-यांना अनुदान मिळवून देण्यासाठी वाल्मिक कराडने प्रत्येकी शेतक-यांकडून आठ-आठ लाख रुपये घेतल्याचे त्यांनी सांगितले. मात्र, या शेतक-यांना अनुदान मिळाले नाही. तसेच पैसेही परत केले नाहीत, अशी तक्रार फसवणूक झालेल्या शेतक-यांनी केली.
खा. सुळेंनी पोलिस
अधीक्षकांना फोन
हा प्रकार समोर येताच खासदार सुप्रिया सुळे यांनी जिल्हा पोलिस अधीक्षक पंकज देशमुख यांना फोन केला. त्यांना या प्रकरणाची चौकशी करत शेतक-यांना न्याय द्या, अशी मागणी केली. केंद्र सरकारच्या वतीने ऊसतोडणी मशिनसाठी देण्यात येणारे ४० टक्के अनुदान मिळवून देतो, असे सांगून वाल्मिक कराडने ही फसवणूक केल्याचे शेतक-यांचे म्हणणे आहे.
रक्कम लाटली आणि
फक्त आश्वासने दिली
बारामती तालुक्यातील तरडोली येथील शेतकरी व हार्वेस्टर मालक रामचंद्र विठ्ठल भोसले यांनी मुंडे यांचे कराड हे निकटवर्तीय असून, ते तुम्हाला प्रत्येकी ३६ लाख रुपये अनुदान मिळवून देतील, त्यासाठी प्रत्येकी ८ लाख रुपये द्यावे लागतील, असे सांगण्यात आले होते. पैसे दिल्यानंतर अनुदान कधी मिळणार याची कराडकडे चौकशी करत होते. त्यावेळी वाल्मिक कराडकडून वारंवार आश्वासने दिली जात होती, अशी माहिती सुळेंना दिली.
