लातूर : प्रतिनिधी
राष्ट्रीय आरोग्य अभियानातंर्गत कंत्राटी कर्मचा-यांचे नियमित शासन सेवेत समायोजनास होत असलेल्या विलंबाबाबत व कर्मचा-यांचे विविध प्रश्न मार्गी लागावेत म्हणून लातूर जिल्हा परिषदेच्या समोर गेल्या २३ दिवसापासून बेमुदत कामबंद आंदोलन सुरू होते. राज्यस्तरावर आरोग्य कर्मचा-यांच्या मागण्यानुसार मंत्री प्रकाश अबिटकर यांच्या सोबत झालेल्या चर्चेतून अनेक प्रश्न मार्गी लागल्याने कंत्राटी आरोग्य कर्मचा-यांनी कामबंद आंदोलन बुधवारी सायंकाळी मागे घेतले.
राष्ट्रीय आरोग्य अभियानातंर्गत आरोग्य विभागातील ७१ संवर्गातील कंत्राटी अधिकारी, कर्मचारी ० ते ५ चे लसीकरण, ६० ते १०० वयो गटातील संसर्गजन्य आजारी असलेल्या रूग्णांची सेवा, राष्ट्रीय आरोग्याच्या सर्व आरोग्य सेवा ते बाजावतात. या कंत्राटी कर्मचा-यांच्या मागण्याच्या संदर्भाने गेल्या २३ दिवसापासून आंदोलनाकडे लक्ष वेधावे म्हणून अनेक बाबी केल्या. शेवटी शासन स्तरावरून मागण्य मान्य करण्याचा निर्णय झाल्याने आरोग्य विभागातील कंत्राटी कर्मचा-यांच्या आंदोलनाला यश आले आहे. बुधवारी राज्यस्तरावर आरोग्यमंत्री प्रकाश अबिटकर यांच्या समवेत चर्चा होऊन सकारात्मक १३ मागण्या मान्य झाल्याने आंदोलन बुधवारी सायंकाळी मागे घेण्यात आले. कामबंद आंदोलनात सहभागी अधिकारी व कर्मचारी गुरूवार पासून सेवेत रूजू होणार आहेत.
