नवी दिल्ली : वृत्तसंस्था
नॅशनल टेस्टिंग एजन्सी (एनटीए) ने शनिवारी (दि.१९) जेईई मेन २०२५ सत्र- २ चा निकाल जाहीर केला. जेईई मेन्स २०२५ सत्र-२ ची परीक्षा २ ते ९ एप्रिलदरम्यान एनटीएद्वारे घेण्यात आली होती. या परीक्षेची अंतिम उत्तरसूची १८ एप्रिल रोजी जारी करण्यात आली होती. आता जेईई मेन २०२५ सत्र २ चा निकाल एनटीएने अधिकृत पोर्टलवर जारी केला आहे. या परीक्षेत २४ विद्यार्थ्यांना १०० पर्सेंटाईल गुण मिळाले आहेत.
देशातील २४ टॉपर्समध्ये महाराष्ट्रातील आयुष रवी चौधरी, सानिध्य सराफ, विशाद जैन यांचा समावेश आहे. या वर्षी १०० पर्सेंटाईल गुण मिळवणा-या २४ टॉपर्समध्ये दोन महिला उमेदवार आहेत. पश्चिम बंगालमधील देवदत्त माझी आणि आंध्र प्रदेशातील साई मनोगना गुठीकोंडा यांचा त्यात समावेश आहे. तर उर्वरित २२ पुरुष उमेदवार आहेत.
जेईई मेन सत्र २ पेपर १ मध्ये पात्र ठरलेल्या उमेदवारांसाठी कटऑफ १०० ते ९३.१०२३२६२ आहे. जेईई मेन २०२५ सत्र-२ पेपर १ परीक्षेत सुमारे ९७,३२१ उमेदवारांनी उत्तीर्ण पर्सेंटाईल गुण मिळवले आहेत.
जेईई मेन सत्र-२ पेपर १ परीक्षेसाठी एकूण १०,६१,८४० उमेदवारांनी नोंदणी केली होती. त्यापैकी ९,९२,३५० उमेदवारांनी परीक्षा दिली. जानेवारी २०२५ च्या सत्र १ परीक्षेत १३,११,५४४ उमेदवारांनी नोंदणी केली होती. त्यातील १२,५८,१३६ उमेदवार परीक्षेला बसले होते.
आयआयटी, एनआयटी, आयआयआयटी आणि इतर केंद्रीय अनुदानीत टॉप संस्थांमध्ये प्रवेश मिळविण्याचे उद्दिष्ट असलेल्या अभियांत्रिकी विद्यार्थ्यांसाठी जेईई मेन २०२५ सत्र-२ परीक्षा महत्त्वाची आहे. आता अंतिम उत्तरसूची उपलब्ध झाल्याने विद्यार्थी त्यांची उत्तरे पडताळून पाहू शकतात.
