हिंगोली : प्रतिनिधी
डिझेल व पेट्रोलची महागाई तसेच टंचाईच्या निषेधार्थ क्रांतिकारी शेतकरी संघटनेच्या वतीने मंगळवारी ता. १९ गोरेगाव चौफुली येथे पंतप्रधान नरेंद्र मोदी यांच्या प्रतीकात्मक पुतळ्याचे दहन करण्यात आले. महागाई कमी करून इंधन मुबलक उपलब्ध करून देण्याची मागणी संघटनेने केली आहे.
हिंगोली जिल्ह्यात मागील १५ दिवसांपासून डिझेलची टंचाई निर्माण झाली आहे. जिल्ह्यातील ८६ डिझेल पंपांसाठी दोन लाख ते अडीच लाख लिटरची आवश्यकता असते. सध्या शेती मशागतीची कामे व इतर कामांमुळे डिझेलची मागणी साडेतीन लाख लिटरपर्यंत गेली आहे. मात्र जिल्ह्याला वाढीव पुरवठा होत नसल्याने डिझेलची टंचाई निर्माण झाली आहे.
जिल्ह्यात डिझेल पंपावर डिझेल मिळविण्यासाठी रांगा लागत असून तब्बल तीन ते चार तास रांगेत थांबावे लागत आहे. त्यातच इंधनाची दरवाढ करण्यात आली आहे. डिझेल तुटवड्यामुळे शेती मशागतीच्या कामांवर गंभीर परिणाम होत आहे. पेरणीपूर्व मशागत, फवारणी, पाणीपुरवठा यासाठी डिझेल अत्यावश्यक असताना शेतक-यांना पंपावर डिझेल मिळत नसल्याने संतापाची लाट निर्माण झाली आहे.
दरम्यान, केंद्र व राज्य शासनाकडून इंधन उपलब्धतेकडे दुर्लक्ष होत असल्याच्या निषेधार्थ क्रांतिकारी शेतकरी संघटनेच्या पदाधिका-यांनी सेनगाव तालुक्यातील गोरेगाव चौफुली येथे आंदोलन केले. यावेळी केंद्र व राज्य शासनाच्या चुकीच्या नियोजनाच्या निषेधार्थ घोषणाबाजी करण्यात आली. त्यानंतर पंतप्रधान नरेंद्र मोदी यांच्या प्रतीकात्मक पुतळ्याचे दहन करण्यात आले. शासनाने तातडीने डिझेल उपलब्ध करून द्यावे अन्यथा शासनाच्या विरोधात आणखी तीव्र आंदोलन करण्याचा इशारा देण्यात आला आहे.
