मुंबई : पुणे स्वारगेट बसस्थानकातील तरुणीवर अत्याचाराची घटना ताजी असताना नालासोपारातून आणखी एक धक्कादायक घटना समोर येत आहे. मुंबईतील काही अंतरावर असणा-या नालासोपारा परिसरात एका इसमाने आपल्या पोटच्या तीन मुलींवर लैंगिक अत्याचार केल्याची धक्कादायक घटना घडली आहे. या तीन मुलींनी नालासोपारा पोलिस ठाण्यात तक्रार दाखल केल्यानंतर हे प्रकरण उघडकीस आले आहे.
मुलींचे वडील खंडणी, गोळीबार आणि खून यासारख्या गंभीर गुन्ह्यांतील आरोपी आहे. बुधवारी (२६ फेब्रुवारी) नालासोपारा पोलिसांनी मुलींचे जबाब नोंदवून गुन्हा दाखल केला आहे. या आरोपीचा शोध नालासोपारा पोलिस घेत आहेत. पीडित मुली या सख्ख्या बहिणी आहेत. त्या मूळच्या कोकणातील राहणा-या असून मुलींचा ५६ वर्षीय वडील एक कुख्यात गुन्हेगार आहे. त्याला एकूण ५ मुली आहेत. कोकणातील गावी असताना तो या मुलींवर बळजबरी करून त्यांचे लैंगिक शोषण करायचा. यापैकी एका मुलीचा चार वेळा गर्भपातही करण्यात आला. अखेर वडिलांच्या छळाला कंटाळून आई पाचही मुलींना घेऊन नालासोपारा येथे एका नातेवाईकाच्या आश्रयाला आली.
मुलींपैकी मोठी मुलगी २१ वर्षांची आहे आणि इतर दोन मुली तिच्यापेक्षा लहान आहेत. जेव्हा ही घटना घडली तेव्हा े लैंगिक अत्याचाराची तक्रार करण्याचा निर्णय घेतला. मोठ्या मुलीने याबाबतची फिर्याद दिली आहे. आतापर्यंत वडिलांच्या दहशतीमुळे गप्प बसल्याचे मुलींनी पोलिसांना सांगितले. मुलींच्या तक्रारीवरून नालासोपारा पोलिसांनी आरोपीविरोधात बलात्कार आणि पोक्सो अंतर्गत गुन्हा दाखल केला आहे. आरोपी हा एक कुख्यात गुन्हेगार आहे. त्याच्याविरुद्ध खून, हल्ला, गोळीबार इत्यादी गंभीर गुन्हे दाखल आहेत.
