बुलडाणा : प्रतिनिधी
बुलडाण्यामध्ये बस आणि विटा वाहतूक करणा-या वाहनाचा भीषण अपघात झाला आहे. या अपघातामध्ये चार जणांचा जागीच मृत्यू झाला आहे. तर १० ते १५ जण जखमी झाल्याची माहिती मिळाली आहे. बुलडाण्यातील खामगाव ते नांदुरा महामार्गावर आमसरी फाटा येथे आज सकाळी हा भीषण अपघात झाला.
मिळालेल्या माहितीनुसार, अपघातग्रस्त बस ही मध्य प्रदेश परिवहन महामंडळाची आहे. बस आणि विटा वाहतूक करणा-या वाहनाची समोरासमोर जोरदार धडक झाली. अपघातानंतर एकच खळबळ उडाली.स्थानिकांनी मदतीसाठी धाव घेत पोलिसांना पाचारण केले.
प्रत्यक्षदर्शींच्या माहितीनुसार, बस आणि विटा वाहतूक करणारी ही दोन्ही वाहने प्रचंड वेगात होती. धडक इतकी जोरदार होती की बस आणि वाहनाचा पुढील भाग पूर्णपणे चक्काचूर झाला. अपघातानंतर रस्त्यावर काचांचा खच पडला. रस्त्यावर विटा पसरल्या होत्या. जखमी प्रवाशांचा आक्रोश आणि गोंधळामुळे परिसरात तणावपूर्ण वातावरण निर्माण झाले होते.
या अपघाताची माहिती मिळताच खामगाव पोलिस आणि स्थानिक नागरिकांनी घटनास्थळी धाव घेतली. जखमींना तातडीने खामगाव येथील सरकारी रुग्णालयात दाखल करण्या आले. काही जखमींची प्रकृती चिंताजनक असल्याचे समजते. पोलिसांनी घटनास्थळाचा पंचनामा करून तपास सुरू केला आहे. पोलिसांकडून मृतांची ओळख पटवण्याचे काम सुरू आहे.
