केजमध्ये भीषण दुर्घटना, एक ठार १५ जण जखमी
बीड : प्रतिनिधी
भरधाव वेगातील कंटेनरने आज ८ ते १० वाहनांना धडक दिली, या अपघातात एक महिलेचा मृत्यू झाला असून, १५ जण जखमी झाले आहेत. ही घटना बीड जिल्ह्यातील केजमध्ये घडली. या दुर्घटनेनंतर जमाव संतप्त झाला आणि या संतप्त जमावाने कंटेनरला आग लावली. या आगीत कंटेनर जळून खाक झाला. घटनेची माहिती मिळताच पोलिसांनी तातडीने घटनास्थळी धाव घेतली. कंटेनर चालकाविरोधात गुन्हा दाखल करण्यात आला.
बीडच्या केज शहरात भरधाव वेगातील कंटेनर चालकाने तब्बल आठ ते दहा गाड्यांना धडक दिली. या अपघातात एक महिला ठार झाली असून, १५ जण जखमी झाल्याची माहिती आहे. या अपघातात वाहनांचे मोठे नुकसान झाले आहे. अपघातानंतर कंटेनर चालकाने कंटेनरसह पळून जाण्याचा प्रयत्न केला. कंटेनर केजहून पुढे अंबाजोगाईकडे जात होता. त्यावेळी पोलिसांनी तातडीने कारवाई करत हा कंटेनर ताब्यात घेतला. जखमींना स्थानिकांच्या मदतीने उपचारासाठी केज येथील उपजिल्हा रुग्णालयात दाखल करण्यात आले आहे.
या अपघातात वाहनांंचे प्रचंड नुकसान झाले आहे. हा अपघात नेमका कशामुळे झाला, याचे कारण अद्याप अस्पष्ट आहे. मात्र भरधाव कंटेनरवरील नियंत्रण सुटून हा अपघात झाला असावा, असा अंदाज आहे. या प्रकरणी पोलिसांनी कंटेनरचालकाविरोधात गुन्हा दाखल केला असून, पुढील तपास केज पोलिस करीत आहेत.
कंटेनर जळून खाक
भरधाव कंटेनरने आठ ते दहा वाहनांना उडवल्याने वाहनांचे मोठे नुकसान झाले. यासोबतच एका महिलेचा अपघातात मृत्यू झाला आणि १५ जण जखमी झाले. यानंतर संतप्त जमावाने या कंटेनेरला आग लावली. यात कंटेनर जळून खाक झाला.
