लातूर : प्रतिनिधी
राज्य शासनाच्या पर्यटन व सांस्कृतिक कार्य विभागामार्फत राज्यातील गणेशोत्सव मंडळांसाठी उत्कृष्ट सार्वजनिक गणेशोत्सव मंडळ स्पर्धा जाहीर करण्यात आली आहे. याबाबत ३१ जुलै २०२४ रोजी शासन निर्णय निर्गमित करण्यात आला आहे. ७ सप्टेंबरपासून सुरु होणा-या गणेशोत्सवात राज्यातील उत्कृष्ट गणेशोत्सव मंडळांना राज्य शासनाकडून पुरस्कार देण्यात येणार आहे. यासाठी ३१ ऑगस्टपर्यंत अर्ज करण्याचे आवाहन करण्यात आले आहे. राज्यातील प्रथम गणेश मंडळास पाच लाख रुपयांचे पारितोषीक दिले जाणार आहे.
या स्पर्धेत धर्मादाय आयुक्त यांच्याकडे नोंदणी केलेल्या किंवा स्थानिक पोलीस स्टेशन यांची किंवा स्थानिक स्वराज्य संस्था यांची परवानगी घेतलेल्या सार्वजनिक गणेशोत्सव मंडळांना सहभागी होता येणार आहे. राज्यातील प्रथम, द्वितीय आणि तृतीय क्रमांक मिळविणा-या गणेशोत्सव मंडळाना अनुक्रमे ५ लाख रुपये, २ लाख ५० हजार रुपये आणि १ लाख रुपये पारितोषिक व प्रमाणपत्र देऊन गौरव करण्यात येणार आहे.
तसेच राज्य समितीकडे ३६ जिल्ह्यातील प्रत्येकी १ याप्रमाणे ३६ प्राप्त शिफारसीत गणेशोत्सव मंडळापैकी ३ विजेते गणेशोत्सव मंडळ वगळून उर्वरित ३३ गणेशोत्सव मंडळांचाही राज्य शासनाकडून प्रत्येकी २५ हजार रुपये पारितोषिक व प्रमाणपत्र देऊन गौरव करण्यात येणार आहे. प्रत्येक जिल्ह्यातील गणेशोत्सव मंडळाची निवड करण्यासाठी जिल्हास्तरीय समिती गठीत करण्यात येणार आहे. या स्पर्धेची माहिती आणि अर्ज करण्यासाठी ँ३३स्र://स्र’ीि२ँस्रंल्लीि‘ं’ंंूंीिे८.ङ्म१ॅ या संकेतस्थळाला भेट द्यावी. या स्पर्धेसाठी अर्ज स्वीकारण्याची अंतिम मुदत ३१ ऑगस्टपर्यंत आहे.
