लातूर : प्रतिनिधी
लातूर शहराच्या पूर्व भागात वाढलेल्या अवैध सावकारकीचा बंदोबस्त करावा, भरमसाठ व्याज वसूल करण्यासाठी गरीब गरजू जनतेचा छळ करून त्यांच्यावर अत्याचार केले जात आहेत. या सर्व प्रकारणाची वरिष्ठ अधिका-यांमार्फत चौकशी करून संबंधितावर कारवाई करावी, अशी मागणी बुधवार दि. १६ जुलै रोजी माजी मंत्री, आमदार अमित विलासराव देशमुख यांनी विधानसभेत केली.
पावसाळी अधिवेशनादरम्यान बुधवारी विधानसभेत बोलताना अवैध सावकारीचा मुद्दा आमदार अमित विलासराव देशमुख यांनी उचलून धरला, ते म्हणाले की, अवैध सावकारीची महाराष्ट्रात गंभीर समस्या निर्माण झालेली आहे. लातूरमध्येही हा प्रश्न गंभीर आहे. वैध वित्त संस्थांकडून कर्ज पुरवठा होत नसल्यामुळे लातूर शहराच्या पूर्व भागात अवैध सावकारीचा सुसळाट निर्माण झाला आहे. दाम दुप्पट व्याज वसुलीसाठी अवैध सावकारांकडून गरीब जनतेचा छळ होत आहे, प्रसंगी मुली, महिलावर अत्याचार करण्याच्या धमक्यात दिल्या जात आहेत.
या संबंधीच्या अनेक तक्रारी आल्या आहेत. त्यामुळे यासंदर्भात सक्षम अधिका-याकडून चौकशी करण्यात यावी, सावकारीच्या परवान्याची पडताळणी करून योग्य निर्णय घेतले जावेत, गंभीर स्वरूपातील अत्याचाराच्या घटनेबाबत विशेष पोलीस महानिरीक्षक आणि पोलीस अधीक्षकाच्या पातळीवरून चौकशी आणि कारवाई करण्यात यावी, अशी मागणी आमदार अमित देशमुख यांनी यावेळी विधानसभेत बोलताना केली.
