नागपूर : प्रतिनिधी
शेतकरी विरोधी, दलितांवर अत्याचार करणारे आणि दिवसा ढवळ्या खून करणारे हे सरकार असल्याचा गंभीर आरोप करत विधान परिषदेचे विरोधी पक्षनेते अंबादास दानवे यांनी सरकारकडून आयोजित केलेल्या चहापानावर बहिष्कार घालण्याचा निर्णय महाविकास आघाडीने घेतल्याची माहिती दिली. आज हिवाळी अधिवेशनाच्या पूर्वसंध्येला नागपूर येथील रविभवन येथे महाविकास आघाडीच्या संयुक्त बैठकीनंतर आयोजित पत्रकार परिषदेत ते बोलत होते.
रविभवन येथे काँग्रेस प्रदेशाध्यक्ष नाना पटोले, राष्ट्रवादी काँग्रेस शरदचंद्र पवार पक्षाचे विधिमंडळ नेते जितेंद्र आव्हाड, आमदार विजय वडेट्टीवार, शिवसेना उद्धव बाळासाहेब ठाकरे पक्षाचे प्रतोद सुनील प्रभू, आमदार महेश सावंत, आमदार ज. मो. अभ्यंकर यांच्या उपस्थितीत पत्रकार परिषद पार पडली.
अंबादास दानवे म्हणाले की, ईव्हीएमच्या आधारावर हे सरकार आलं आहे. सोयाबीन, कापसाला भाव नाही, दुधाचे भाव घसरले असून शेतक-यांची दयनीय अवस्था या सरकारमुळे झाली आहे. त्यामुळे महाराष्ट्रातील जनतेचे प्रश्न आणि समस्या सभागृहात जोरदर ताकदीने मांडणार असल्याची ग्वाही अंबादास दानवे यांनी दिली. तसेच परभणी येथे संविधानाची विटंबना झाल्यावर उमटलेल्या पडसादानंतर झालेल्या कोंबिग ऑपरेशन दरम्यान अटक केलेल्या सोमनाथ सोमवंशी या तरुणाचा कारागृहात मृत्यू झाला आहे. अशा सर्व घटना घडत असताना मुख्यमंत्री हे मिरवणुकीत गुंतले आहेत. सरकारचे या सर्व घटनांकडे लक्ष आहे की नाही? असा प्रश्न अंबादास दानवे यांनी उपस्थित केला आहे.
अधिवेशन अधिक कालावधीसाठी चालवावे : विजय वडेट्टीवार
विधान सभेचे विरोधीपक्षनेते विजय वडेट्टीवार म्हणाले की, नवीन सरकार आल्यावर आणि विदर्भातील मुख्यमंत्री झाल्यावर तीन आठवड्याचे अधिवेशन असेल, ही वैदर्भीय जनतेची अपेक्षा होती. मात्र त्यांच्या अपेक्षेला या सरकारने हरताळ फासली गेले. सोयाबीनला हमीभाव नाही, धानाला भाव नाही, सरकारने दिलेल्या आश्वासनांची पूर्तता व्हावी ही अपेक्षा होती. तसेच हे अधिवेशन अधिक कालावधीसाठी चालवावे, अशी मागणीही वडेट्टीवार यांनी यावेळी केली.
शेतकरी कर्जमाफीची भूमिका स्पष्ट करा : नाना पटोले
बीडचे सरपंच संतोष देशमुख यांची क्रूर हत्या करण्यात आली आहे. त्यांचे प्रेत नासण्याचे काम हत्येकरांनी केले. तसेच सोयाबीन खरेदी केंद्र अजून सुरू झालेले नाही. त्यामुळे शेतकरी कर्जमाफीची भूमिका सरकारने स्पष्ट करावी, अशी मागणी नाना पटोले यांनी केली आहे.
